Deputat Abdumannop Abdukayumov mahalla yettiligi bilan uchrashib, hududdagi ustuvor vazifalarni muhokama qildi

🏛 Xalq deputatlari Olmazor tumani Kengashi deputati Abdumannop Abdukayumov tomonidan Olmazor tumanidagi "Chamanbog'" mahalla fuqarolar yig‘inida xalq deputatlari Toshkent shahar Kengashi deputati Frangiza Akramova, mahalla yettiligi a’zolari, hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim, soliq inspektori, mahalla raisi, mahalla faollari hamda aholi vakillari ishtirokida ochiq muloqot tashkil etildi.

🤝 Uchrashuvda deputatlar tomonidan Prezidentimizning 2026-yil 1-apreldagi PQ–120-sonli "O‘zbekiston Respublikasi davlat mustaqilligining 35 yilligini keng nishonlashga tayyorgarlik ko‘rish va uni o‘tkazish to‘g‘risida"gi qarori, shuningdek, Prezidentimiz raisligida o‘tkazilgan pensiya tizimini isloh qilish hamda mahalla va yoqilg‘i-energetika sohasiga bag‘ishlangan videoselektor yig‘ilishlarida belgilangan ustuvor vazifalarning mazmun-mohiyati yuzasidan batafsil tushuntirishlar berildi.

📝 Shuningdek, uchrashuv davomida deputat tomonidan 2026-yilning birinchi yarim yilligida amalga oshirilgan deputatlik faoliyati, saylovchilar murojaatlari yuzasidan olib borilgan ishlar va erishilgan natijalar haqida batafsil axborot berildi. Xususan, mahalla yettiligi vakillari bilan birgalikda yilning ikkinchi yarmida hududda amalga oshirilishi lozim bo‘lgan ustuvor vazifalar, mavjud muammolar va kelgusidagi rejalar muhokama qilinib, mahalliy Kengash deputatlari faoliyatini samarali tashkil etish maqsadida tavsiya etilgan 24 ta ustuvor yo‘nalish hamda amaldagi qonunchilik talablari asosida mahalladagi mavjud holat kompleks tahlil qilindi.

🔺 Muloqot davomida aholini ijtimoiy himoya qilish, bandlikni ta’minlash, yoshlar va xotin-qizlarni qo‘llab-quvvatlash, hokim yordamchisi faoliyati samaradorligi, ichki yo‘llar va ko‘chalarni yoritish, kommunal xizmatlar sifati, chiqindilarni o‘z vaqtida olib chiqish, jamoat xavfsizligini mustahkamlash, hududni obodonlashtirish hamda fuqarolar farovonligini oshirishga qaratilgan dolzarb masalalar yuzasidan fikr va takliflar bildirildi.

📁 Mahalla faollari va fuqarolar tomonidan ko‘tarilgan murojaatlar xalq vakili tomonidan atroflicha o‘rganilib, ularni tizimli hal etish, mas’ul tashkilotlar bilan hamkorlikni kuchaytirish, davlat dasturlari ijrosini ta’minlash hamda zarur hollarda deputatlik nazorati doirasida tegishli choralarni ko‘rish bo‘yicha kelishuvlarga erishildi.

💬 Tadbir yakunida deputatlar tomonidan mahalla taraqqiyoti, aholi farovonligini oshirish, davlat va jamiyat o‘rtasidagi hamkorlikni yanada mustahkamlash hamda hududdagi muammolarni manzilli hal etish yuzasidan tegishli tavsiya va takliflar berildi.

📉 Bunday ochiq muloqotlar mahallalarda mavjud muammolarni joyida o‘rganish, fuqarolar murojaatlariga tezkor yechim topish hamda deputatlik nazoratining samaradorligini oshirishga xizmat qilmoqda.