20-sonli davlat maktabgacha ta’lim tashkilotida xavfsizlik holati o‘rganildi

O‘zbekiston Xalq demokratik partiyasi Markaziy Kengashi Ijroiya qo‘mitasi Hay’atining 2026-yil 3-apreldagi H-4/3-sonli qarori ijrosini ta’minlash hamda ta’lim tashkilotlarida bolalarning hayoti va sog‘lig‘ini muhofaza qilish, ular uchun xavfsiz va qulay shart-sharoitlar yaratish maqsadida o‘rganish ishlari olib borildi.

Xalq deputatlari Navoiy shahar Kengashi deputati Xudayqulova Nargiza Gaybullayevna tomonidan Navoiy shahridagi 20-sonli davlat maktabgacha ta’lim tashkilotida tarbiyalanuvchilarning hayoti va sog‘lig‘ini muhofaza qilish, yong‘in, elektr, sanitariya-gigiyena hamda umumiy xavfsizlik talablariga rioya etilishi holati o‘rganildi.

O‘rganish davomida maktabgacha ta’lim tashkilotidagi tarbiyalanuvchilar foydalanadigan mashg‘ulot xonalarining holati ko‘zdan kechirilib, ayrim xonalardagi linoleum qoplamalarining 80 foizga yaqini yaroqsiz holga kelgani aniqlandi.

Mazkur holat bolalar uchun xavfsiz muhit yaratish, sanitariya-gigiyena talablariga rioya etish hamda mashg‘ulot jarayonlarini sifatli tashkil etishga salbiy ta’sir ko‘rsatishi mumkinligi qayd etildi.
Aniqlangan masala yuzasidan Navoiy shahar maktabgacha va maktab ta’limi bo‘limi boshlig‘iga deputatlik so‘rovi yuborildi. Unda yaroqsiz holga kelgan linoleum qoplamalarini almashtirish bo‘yicha amalga oshirilayotgan chora-tadbirlar, mavjud rejalar hamda belgilangan vazifalar yuzasidan tegishli ma’lumot taqdim etish so‘raldi.

Mazkur masala O‘zbekiston Respublikasining 2020-yil 23-sentabrdagi O‘RQ-637-son “Ta’lim to‘g‘risida”gi Qonuni, 2019-yil 16-dekabrdagi O‘RQ-595-son “Maktabgacha ta’lim va tarbiya to‘g‘risida”gi Qonuni, shuningdek, maktabgacha ta’lim tashkilotlarida bolalarning hayoti va sog‘lig‘ini muhofaza qilish, sanitariya-gigiyena hamda xavfsizlik talablariga oid amaldagi normativ-huquqiy hujjatlar talablari asosida ko‘rib chiqilmoqda.