2-sonli davlat maktabgacha ta’lim tashkilotida o‘rganish ishlari olib borildi

Xalq deputatlari Navoiy shahar Kengashi deputati Shahnoza Azamatovna hamda Xalq deputatlari Navoiy shahar Kengashi kotibiyati bosh mutaxassisi Muborak Astanova tomonidan belgilangan reja-grafikka muvofiq 2-sonli davlat maktabgacha ta’lim tashkiloti faoliyati o‘rganildi.

O‘rganish jarayonida muassasada tarbiyalanuvchilar uchun yaratilgan shart-sharoitlar, ta’lim-tarbiya jarayonining tashkil etilishi, moddiy-texnik bazaning holati, bino va hududning obodonlashtirilganligi, sanitariya-gigiyena talablariga rioya etilishi hamda yong‘in va elektr xavfsizligi talablarining bajarilishi ko‘zdan kechirildi.

Shuningdek, muassasa oshxonasining faoliyati, oziq-ovqat mahsulotlarini saqlash sharoitlari, ularning yaroqlilik muddatlariga rioya etilishi, tayyorlanayotgan taomlarning sifati, oziq-ovqat mahsulotlarini qabul qilish va saqlash tartibiga amal qilinishi hamda oshxonaning sanitariya holati atroflicha o‘rganildi.

Bundan tashqari, mashg‘ulot va yotoq xonalarining holati, bolalar foydalanayotgan inventarlar va jihozlarning sozligi, hududning tozaligi hamda tarbiyalanuvchilar uchun yaratilgan xavfsiz va qulay muhit yuzasidan o‘rganish ishlari olib borildi.

O‘rganish yakunlari bo‘yicha aniqlangan ayrim kamchiliklarni bartaraf etish, muassasada sanitariya-gigiyena va xavfsizlik talablariga to‘liq rioya etilishini ta’minlash hamda tarbiyalanuvchilar uchun yaratilgan shart-sharoitlarni yanada yaxshilash yuzasidan tegishli tavsiya va takliflar bildirildi.

Xalq deputatlari Navoiy shahar Kengashi tomonidan maktabgacha ta’lim tashkilotlarida bolalarning hayoti va sog‘lig‘ini muhofaza qilish, xavfsiz hamda zamonaviy ta’lim muhitini yaratish yuzasidan amalga oshirilayotgan o‘rganish va nazorat ishlari belgilangan reja asosida izchil davom ettirilmoqda.