Belgilangan reja asosida Xalq deputatlari Termiz shahar Kengashi kotibiyati mudiri, deputat A.Ashurov hamda Kengash kotibiyati bosh mutaxassisi R.Mamashukurov shaharning "Alpomish" mahallasida joylashgan “Surxondaryo suv ta’minoti” AJ Termiz shahar bo‘limida bo‘lib, korxona rahbariyati va mas’ul xodimlari bilan muloqot o‘tkazdilar.

Uchrashuv va muloqot davomida Termiz shahrida aholi hamda ijtimoiy soha obyektlarini toza ichimlik suvi bilan ta’minlash hamda oqova suv xizmatlari sifatini oshirish borasidagi amaliy ishlar tahlil qilindi.

Xususan, quyidagi muhim masalalar ko‘rib chiqildi:
Murojaatlar bilan ishlash: Aholidan ichimlik suvi bosimi, quvurlardagi nosozliklar va toza suv ta’minoti bo‘yicha kelib tushayotgan murojaatlarning o‘z vaqtida hal etilishi;
Avariya xizmati tezkorligi: Tarmoqlardagi nosozliklarni tezkor bartaraf etish bo‘yicha maxsus brigadalar faoliyati va texnika ta’minoti;
Mavsumiy tayyorgarlik: Suv inshootlari hamda quvurlarni kuz-qish mavsumiga tayyorlash va rejaviy ta’mirlash ishlarining borishi;
To‘lovlar va hisob-kitob: Suv sarfini hisobga olish uskunalarining (schetchik) o‘rnatilishi va debitor qarzdorlikni kamaytirish borasidagi choralar.

Uchrashuv jarayonida Kengash kotibiyati mudiri, deputat A.Ashurov shunday ta’kidladi:

"Ichimlik suvi ta’minoti — aholimiz turmush farovonligi va salomatligi bilan bevosita bog‘liq eng muhim hayotiy sohadir. Har bir mahalla va xonadonga sifatli suv uzluksiz yetib borishi va fuqarolarning bu boradagi murojaatlariga tezkor yechim topilishi shart. Deputatlik nazorati orqali korxona faoliyatiga ko‘maklashish va mavjud muammolarni birgalikda hal etish asosiy maqsadimizdir."

Muloqot yakunida aniqlangan kamchiliklarni bartaraf etish, aholi murojaatlarini hal etishda xonadonbay yondashuvni kuchaytirish hamda suv ta’minotini yaxshilash bo‘yicha deputatlik tavsiyalari berildi. Bildirilgan takliflar va amaliy choralar Kengash nazoratiga olindi.