Xalq deputatlari Qo‘qon shahar Kengashi raisi va deputati F.Mamajonov tomonidan fuqarolar murojaati asosida navbatdagi deputatlik so‘rovi yuborildi.

Deputatning "Aziztepa" mahalla fuqarolar yig‘inida saylovchilar bilan o‘tkazgan uchrashuvi davomida mahalla hududidan oqib o‘tuvchi “Avg‘on” arig‘ining uzoq yillardan buyon tozalanmagani, buning natijasida ekologik holat yomonlashib, sanitariya-gigiyena talablariga salbiy ta’sir ko‘rsatayotgani hamda aholi o‘rtasida haqli e’tirozlarga sabab bo‘layotgani yuzasidan murojaat bildirildi.

Mazkur murojaat yuzasidan O‘zbekiston Respublikasining “Xalq deputatlari viloyat, tuman va shahar Kengashi deputatining maqomi to‘g‘risida”gi Qonuni talablariga muvofiq, Qo‘qon shahar hokimining qurilish, to‘siqsiz muhit yaratish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari nomiga deputatlik so‘rovi yuborildi.

Deputatlik so‘rovida “Aziztepa” MFY hududidagi “Avg‘on” arig‘ini tozalash ishlari qachon amalga oshirilishi, mazkur masala bo‘yicha ko‘rilayotgan chora-tadbirlar hamda asoslantirilgan ma’lumot taqdim etish so‘ralgan.

Mazkur masala deputat nazoratiga olingan bo‘lib, uning ijrosi yuzasidan amalga oshirilayotgan ishlar va natijalar haqida jamoatchilikka qo‘shimcha ma’lumotlar berib boriladi.

Xalq deputatlari Qo‘qon shahar Kengashi