Xalq deputatlari Chilonzor tuman Kengashi deputati Xidiyatulina Rima Rashitovna o‘z saylov okrugi hududidagi 1-Qatortol mahallasida xotin-qizlar faollari bilan uchrashib, oilalar barqarorligi va mahalladagi dolzarb ijtimoiy masalalar yuzasidan muloqot olib bordi.

Uchrashuv davomida oilaviy ajrimlarning oldini olish, erta turmush qurish holatlariga yo‘l qo‘ymaslik, to‘y va oilaviy marosimlarda ortiqcha dabdababozlikning oldini olish, shuningdek, yaqin qarindoshlar o‘rtasidagi nikohlarning salbiy oqibatlari kabi muhim masalalar atroflicha muhokama qilindi.

Ayniqsa, oilaviy ajrimlarning kelib chiqish sabablarini o‘z vaqtida aniqlash, nizoli va muammoli oilalar bilan manzilli ishlash, yoshlarni oilaviy hayotga mas’uliyat bilan tayyorlash hamda oilalarda sog‘lom ma’naviy muhitni mustahkamlash zarurligiga alohida e’tibor qaratildi.

Shuningdek, to‘y va marosimlarni ortiqcha dabdaba va isrofgarchiliksiz tashkil etish, erta nikohlarning oldini olish hamda yaqin qarindoshlar o‘rtasidagi nikohning mumkin bo‘lgan salbiy oqibatlari haqida aholi, ayniqsa, yoshlar o‘rtasida tushuntirish va profilaktika ishlarini kuchaytirish yuzasidan fikr almashildi.

Deputat mazkur masalalarni hal etishda mahalla faollari, xotin-qizlar faollari hamda tegishli mutasaddi tashkilotlarning o‘zaro hamkorligini kuchaytirish va profilaktik ishlarni tizimli davom ettirish muhimligini ta’kidladi.