Xalq deputatlari Nurobod tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi raisi X.Xazratova hamda mazkur doimiy komissiyaga biriktirilgan tashkilot vakili G.Mirzayeva hamkorlikda tumandagi mahallalarda faoliyat yuritayotgan profilaktika inspektorlari bilan uchrashuvlar o‘tkazdi.

O‘rganishlar davomida O‘zbekiston Respublikasining 2022-yil 15-apreldagi O‘RQ-764-son "Kiberxavfsizlik to‘g‘risida"gi Qonuni ijrosi yuzasidan joylarda amalga oshirilayotgan ishlar holati atroflicha tahlil qilindi.

Jumladan, profilaktika inspektorlari tomonidan fuqarolar, ayniqsa yoshlar o‘rtasida internet va axborot-kommunikatsiya texnologiyalaridan xavfsiz foydalanish madaniyatini shakllantirish, kiberjinoyatlarning oldini olish, firibgarlik va shaxsiy ma'lumotlarni himoya qilish bo‘yicha olib borilayotgan targ‘ibot-tashviqot ishlari, aholining huquqiy xabardorligini oshirishga qaratilgan tadbirlar yuzasidan batafsil ma'lumotlar tinglandi.

Shuningdek, qonun talablarini amaliyotga samarali tatbiq etish, fuqarolarni kibermakondagi tahdidlardan ogohlantirish, ijtimoiy tarmoqlar orqali sodir etilayotgan firibgarlik holatlarining oldini olish, profilaktik tadbirlarni yanada kuchaytirish hamda mutasaddi tashkilotlar bilan hamkorlikni mustahkamlash masalalari muhokama qilindi.