Ózbekstan Respublikası Prezidenti Shavkat Mirziyoyevtiń Oliy Majlis hám xalqımızǵa jollaǵan Múrájatı – mámleketimizde ámelge asırılıp atırılǵan reformalardıń barısın tallaw arqalı elimiz rawajlanıwı, máhálleni elede rawajlandırıw, ekonomikanı modernizaciyalaw hám jaslardıń imkaniyatların ele de keńeytiwge qaratılǵan áhmiyetli hújjet bolıp esaplanadı.

Múrájat mámleketlik siyasattaǵı tiykarǵı baǵdarlardı anıq belgilep, atap aytqanda, ekonomikanıń ósimin támiyinlew, kásiplik tayarlaw, miynet bazarı hám bilimlendiriw tarawında ámelge asırılıp atırǵan reformalarǵa ayrıqsha itibar qaratılǵanı hám máhálle institutınıń elede rawajlanıwına túrtki bolatuǵın qatar baslamalar menen jáne de áhmiyetli sanaladı.

Mámleketimiz Prezidentiniń Múrájatında belgilengen tiykarǵı baǵdarlar – bilimlendiriwdiń sapasın arttırıw, ilim hám innovaciyalardı rawajlandırıw, jaslardı hár tárepleme qollap-quwatlaw, bántlikti támiyinlew, sociallıq ádillik hám nızam ústinligin bekkemlew máseleleri hár tárepleme sáwlelengenligi, “Ózbekstan – 2030” strategiyasında belgilengen uzaq múddetli maqsetler elimizdi rawajlanǵan, básekige shıdamlı hám xalıqtıń abadanlıǵın támiyinleytuǵın mámleketke aylandırıwǵa xızmet etetuǵının kórsetpekte.

Múrájatta 2026-jıldıń "Máhállelerdi rawajlandırıw hám jámiyetti jetilistiriw jılı" - dep járiyalanıwı - reformalardıń eń tómengi buwında – máhálleden, shańaraqtan baslanıwın hám xalqımız párawanlıǵına xızmet etetuǵınlıǵınan derek beredi. Endi máhálle tek ǵana sociallıq institut emes, al ekonomikalıq ósiw noqatına aylanadı. Byudjet qarjıların tikkeley máhálleniń ıqtıyarına beriw hám salıq túsimleriniń belgili bir bólegin jergilikli dárejede qaldırıw - bul haqıyqıy xalıq hákimiyatınıń ámeliy kórinisi hám máhálledegi jergilikli mashqalalardıń ámeliy sheshimine xızmet etedi.

Prezidentimiz tárepinen jalpı ishki ónim kólemin 167 milliard dollarǵa jetkeriw wazıypası qoyılǵanı mámleket ekonomikası jańa basqıshqa shıqqanın ańlatadı. Eń áhmiyetlisi, endi ósiw tek ǵana shiyki zat esabınan emes, al joqarı texnologiyalar, innovaciyalıq sanaat, sanlı ekonomika arqalı támiyinleniwi strategiyalıq jaqtan durıs tańlaw bolıp tabıladı.

Prezidenttiń korrupciyaǵa qarsı "ayrıqsha jaǵday" járiyalawı jámiyette ádillik sezimin elede bekkemleydi. Komplaens qadaǵalawınıń kúsheytiliwi hám tergew-sud sistemasına "xalıq wákilleri kollegiyası"nıń kirgiziliwi mámleketlik basqarıwdıń ashıq-aydınlıq, áshkaralıqtı jańa basqıshqa alıp shıǵadı.

Bul Múrájat elimizde ámelge asırılıp atırılǵan keń kólemli reformalardıń dawamına jańa basqısh xızmetin ótep, belgilengen wazıypalar Ózbekstannıń 2030-jılǵa shekemgi maqsetlerine múddetinen aldın erisiw imkaniyatın beriwi sózsiz. Xalıqtıń birligi hám máhálleniń jámiyettegi roline berilgen joqarı baha - Jańa Ózbekstandı qurıwda tiykarǵı kúsh áyne xalıq ekenin jáne bir márte tastıyıqlaydı. Bul maqsetli reformalardıń orınlarda nátiyjeli engiziliwine ámeliy úles qosıw jergilikli Keńes deputatları, jámiyetlik shólkemlerdiń de óz-ara birge islesiwin bekkemlewde úlken áhmiyetke iye dep bilemen.

Mámleketimiz basshısı tárepinen alǵa qoyılǵan reformalar, sociallıq-ekonomikalıq rawajlanıw baǵdarları, insan qádiri, jaslar siyasatı, ruwxıy-aǵartıwshılıq tarawdaǵı áhmiyetli wazıypalardı máhálle turǵınları hám jámiyetshilik wákilleri arasında keńnen úgit-násiyatlaw maqsetinde deputatlar óz saylaw okruglerinde ushırasıwlar shólkemlestirip, múrájatnamanı xalıqqa jetkizbekte.

N.TLEWMURATOV,

Xalıq deputatları rayonlıq Keńesi 2-Gulistan okruginen deputat, Isbilermenler háreketi – Ózbekstan Liberal demokratiyalıq partiyası deputatlıq toparı baslıǵı.