Namanganda “Besh tashabbus paralimpiadasi”ning shahar bosqichiga start berildi

Namangan shahrida “Besh tashabbus paralimpiadasi” doirasidagi adaptiv sport musobaqalarining shahar bosqichi tantanali ravishda boshlandi. Ushbu musobaqa nogironligi bo‘lgan fuqarolarni sportga keng jalb etish, ularning jismoniy va ruhiy salohiyatini qo‘llab-quvvatlash, jamiyatda faol ishtirokini ta’minlashga qaratilgan muhim tashabbus sifatida e’tirof etilmoqda.

Ochilish marosimida Namangan shahar hokimi, deputat Ayubxon Kamalov boshchiligidagi mutasaddilar ishtirok etib, sportchilarga samimiy tilaklarini bildirdilar. Ular musobaqa qatnashchilariga kuch-g‘ayrat, qat’iyat va yorqin g‘alabalar tilab, bunday tadbirlar ijtimoiy birdamlik va inklyuziv muhitni mustahkamlashda muhim o‘rin tutishini ta’kidladilar.

Mazkur musobaqalar sport orqali nogironligi bo‘lgan yoshlarning o‘zini namoyon etishi, iqtidorini yuzaga chiqarishi hamda sog‘lom turmush tarzini targ‘ib etishda muhim maydon bo‘lib xizmat qiladi.