Xalq deputatlari Qo‘qon shahar Kengashi tomonidan shaharda aholiga qulay, obod va ekologik sof muhit yaratish, yashil hududlarni kengaytirish maqsadida muhim qaror qabul qilindi.

“Yashil makon” umummilliy loyihasi doirasida Kengashning VII-29-74-11-166-K/26-sonli qarori bilan Qo‘qon shahrining “Muqimiy” MFY hududidagi Osiyo va Sangzor ko‘chalarida 3,1 gektar maydonda “Soyali-sayil ko‘chasi” tashkil etiladi.

Mazkur hududda zamonaviy sug‘orish tizimi barpo etilib, mahalliy tuproq-iqlim sharoitiga mos daraxt va ko‘chatlar ekiladi. Obodonlashtirish ishlari jarayonida aholining turar joylari hamda tadbirkorlik subyektlariga tegishli mulklarga daxl qilmaslik choralariga alohida e’tibor qaratiladi.

Shuningdek, “Soyali-sayil ko‘chasi” hududidagi yashil maydonlarni asrash, daraxtlarni nobud qilishning oldini olish hamda ushbu hududda jamoatchilik nazoratini yo‘lga qo‘yish choralari ko‘riladi.

Qarorning ijrosini nazorat qilish Xalq deputatlari Qo‘qon shahar Kengashining Agrar, qurilish, kommunal sohalar, ekologiya, sanoat va transport masalalari doimiy komissiyasi zimmasiga yuklatilgan.

Xalq deputatlari Qo‘qon shahar Kengashi