60-МАКТАБДА КЕНГ КЎЛАМЛИ ЯНГИЛАНИШЛАР АМАЛГА ОШИРИЛДИ
“Соҳил” маҳалласидаги 60-сонли умумтаълим мактабида амалга оширилган бунёдкорлик ва таъмирлаш ишлари якунига етказилиб, яратилган янги имкониятлар фойдаланишга топширилди.
“Ташаббусли бюджет” лойиҳаси доирасида ажратилган 1 миллиард 600 миллион сўм маблағ ҳисобидан мактаб биноси тўлиқ реконструкция қилинди. Ўқувчилар учун қулай шароитларни янада кенгайтириш мақсадида бинонинг ертўла қисми ҳам таъмирланиб, ундан самарали фойдаланиш имконияти яратилди.
Шунингдек, мактаб ҳудудида ёшларни спортга кенг жалб этишга хизмат қилувчи замонавий стадион барпо этилди.
Янгиланган таълим муассасасини фойдаланишга топширишга бағишланган тантанали тадбирда туман ҳокими, Халқ депутатлари Янгиқўрғон тумани Кенгаши депутати Нажмиддинов Асадулла Икромович иштирок этиб, ўқувчилар учун яратилган замонавий шароитлар билан танишди.
Тадбир доирасида мактабларнинг 7–11-синф ўқувчилари ўртасида мини-футбол бўйича “Мактаб лигаси” мусобақасига ҳам старт берилди. Мазкур мусобақа ёшларнинг спортга бўлган қизиқишини ошириш, иқтидорли ўқувчиларни саралаш ҳамда улар ўртасида соғлом рақобат муҳитини шакллантиришга хизмат қилади.
Янгиланган мактаб инфратузилмаси, замонавий стадион ва қўшимча шароитлар ўқувчиларнинг сифатли таълим олиши, бўш вақтини мазмунли ўтказиши ҳамда спорт билан мунтазам шуғулланиши учун янада кенг имкониятлар яратди.