Deputatlik so‘rovi ijrosi ta’minlandi

Xalq deputatlari Qo‘shko‘pir tumani Kengashi deputati S. O‘razmetov tomonidan “Xorazm elektr tarmoqlari” AJ Qo‘shko‘pir tuman elektr ta’minoti korxonasi boshlig‘i S. S. Yusupov nomiga yuborilgan deputatlik so‘rovi ijobiy hal etildi.
Deputatlik so‘rovida “Zarbdor” mahallasi hududidagi 13-son umumta’lim maktabi yaqinida joylashgan transformator atrofi xavfsizlik talablariga muvofiq temir panjara bilan o‘rab olinishi, foydalanish muddati o‘tgan elektr shitlari yangisiga almashtirilishi hamda joyidan siljigan elektr simyog‘ochini qayta o‘rnatish masalalari ko‘tarilgan edi.
Murojaat ijrosi yuzasidan mas’ul korxona tomonidan zarur amaliy ishlar bajarilib, transformator atrofi temir panjara bilan o‘raldi, eskirgan elektr shitlari almashtirildi va siljigan elektr simyog‘ochi qayta o‘rnatildi.
Mazkur deputatlik so‘rovining ijobiy hal etilishi hududda elektr ta’minoti infratuzilmasining xavfsizligi va ishonchliligini mustahkamlash, fuqarolar, ayniqsa, o‘quvchilarning hayoti va salomatligini muhofaza qilish hamda saylovchilar murojaatlari asosida parlament nazoratining amaliy natijasini ta’minlash yo‘lidagi muhim qadamlardan biri bo‘ldi.