Tuman markazidagi istirohat bog‘ida olib borilayotgan rekonstruksiya ishlari deputatlar nazoratida 

Quva tuman markazida joylashgan “Alisher Navoiy”
nomli ko‘ngilochar istirohat bog‘ini zamonaviy talablar asosida qayta barpo etish
ishlari izchil davom etmoqda. Mazkur loyiha O‘zbekiston Respublikasi Prezidentining
2025-yil 1-apreldagi “Respublika hududlarini jadal
kompleks rivojlantirish uchun tanlab olingan tuman (shahar)larda amaliy chora-tadbirlarni
amalga oshirish to‘g‘risida”gi PQ-132-son Qarori ijrosini ta’minlash doirasida amalga
oshirilmoqda. 

Qarorga muvofiq, Quva tuman markazidagi mazkur istirohat
bog‘ini davlat-xususiy sheriklik asosida 7,8 gektar maydonda rekonstruksiya qilish
rejalashtirilgan bo‘lib, unda bolalar uchun zamonaviy o‘yingohlar, savdo va ovqatlanish
konteynerlari, mehmonxona, yopiq akvapark, yoshlar markazi hamda aholi dam olishi
va vaqtni mazmunli o‘tkazishiga xizmat qiladigan turli ko‘ngilochar xizmatlar tashkil
etilishi ko‘zda tutilgan. 

Ayni kunlarda qurilish-montaj ishlari jadal sur’atlarda
olib borilmoqda. Loyiha doirasida hududni obodonlashtirish, yashil hududlar yaratish,
muhandislik-kommunikatsiya tarmoqlarini yangilash hamda xavfsiz va qulay infratuzilmani
shakllantirishga alohida e’tibor qaratilmoqda. 

Shu munosabat bilan Xalq deputatlari Quva tuman
Kengashi deputatlari olib borilayotgan bunyodkorlik ishlari bilan yaqindan tanishish,
loyihaning amalga oshirilish holatini o‘rganish hamda belgilangan vazifalar ijrosi
ustidan deputatlik nazoratini amalga oshirish maqsadida istirohat bog‘iga tashrif
uyushtirdilar. Tashrif davomida deputatlar tomonidan ishlar sifati, belgilangan
muddatlarga rioya etilishi hamda aholi manfaatlarini inobatga olgan holda loyihani
samarali amalga oshirish masalalari yuzasidan mas’ullarga tegishli taklif va tavsiyalar
bildirildi.