Xalq deputatlari Yangiobod tumani Kengashi Kotibiyati mudiri, deputat V.Xasanov tomonidan deputatlik nazorati doirasida tumandagi 19-sonli umumiy o‘rta ta’lim maktabida amalga oshirilayotgan obodonlashtirish va hududni tartibga keltirish ishlari bilan tanishildi.

O‘rganish davomida maktabning ichki va tashqi hududlarida olib borilayotgan obodonlashtirish ishlari, hududning sanitariya-tozalik holati, mavjud yashil maydonlar va daraxtlarni parvarishlash, maktab hovlisini tartibli saqlash hamda o‘quvchilar uchun qulay va xavfsiz sharoit yaratish borasidagi ishlar ko‘zdan kechirildi.

Shuningdek, maktab hududidagi mavjud kamchiliklarni aniqlash, ularni bosqichma-bosqich bartaraf etish, hududni mavsumga mos ravishda obodonlashtirish va ko‘kalamzorlashtirish ishlarini tizimli tashkil etish masalalariga alohida e’tibor qaratildi.

Mas’ullarga maktab hududida tozalik va obodonlashtirish ishlarini muntazam davom ettirish, daraxt va gulzorlarni parvarishlash, foydalanilmayotgan hududlarni tartibga keltirish hamda ta’lim muassasasining tashqi ko‘rinishini yanada yaxshilash bo‘yicha tegishli tavsiya va topshiriqlar berildi.