O‘zbekiston Respublikasi davlat mustaqilligining 35 yilligi munosabati bilan Zomin tumanida “Shukronalik” ma’naviy-ma’rifiy tadbiri tashkil etildi.

Tadbirda Jizzax viloyati Ekologiya va iqlim o‘zgarishi bosh boshqarmasi boshlig‘i, O‘zLiDeP Jizzax viloyat Kengashi raisi Erkin Xalmatov, Viloyat pedagogik mahorat markazi rahbari Ijod Axmedov, Jizzax politexnika instituti dotsenti Shuhrat Turatov, mahalla faollari, nuroniylar hamda keng jamoatchilik vakillari ishtirok etdi.

Tadbir davomida mustaqillikning xalqimiz hayotidagi o‘rni va ahamiyati, yurtimizda hukm surayotgan tinchlik va osoyishtalikning qadr-qimmati, millatlararo totuvlik, bag‘rikenglik hamda o‘zaro hurmatning jamiyat taraqqiyotidagi muhim o‘rni haqida fikrlar bildirildi.

Shuningdek, Zomin tumanida turli millat va elat vakillari o‘rtasida o‘zaro hurmat, do‘stlik, hamjihatlik va bag‘rikenglik muhiti shakllangani ta’kidlandi. Yagona Vatan, mushtarak qadriyatlar va ezgu maqsadlar xalqimizni birlashtirib kelayotgani qayd etildi.

Yig‘ilishda xalqimizning kuch-qudrati, avvalo, uning birligi va ahilligida ekani, fuqarolarning tinch va farovon hayot kechirishi, milliy urf-odat va an’analarini asrab-avaylashi uchun yaratilayotgan shart-sharoitlar mustaqillik yillarida erishilgan muhim yutuqlardan biri ekani alohida ta’kidlandi.

“Shukronalik” ma’naviy-ma’rifiy tadbiri mahalla faollari, nuroniylar va yoshlarni bir davraga jamlab, “O‘zbekiston — umumiy uyimiz” g‘oyasining mazmun-mohiyatini yana bir bor namoyon etdi.

Tadbir yakunida mustaqillik yillarida erishilgan yutuqlar, yurtimizdagi tinchlik va osoyishtalik, millatlararo totuvlik hamda xalqimiz birdamligini asrab-avaylash har bir fuqaroning muhim burchi ekani qayd etildi.