Yig‘ilishda, avvalo, 2026-yilning birinchi yarim yilligi davomida Xalq deputatlari Termiz shahar Kengashi va uning doimiy komissiyalari tomonidan amalga oshirilgan ishlar hamda tasdiqlangan ish rejalarining ijrosi tahlil qilinib, erishilgan natijalar, mavjud muammolar va kelgusidagi ustuvor vazifalar yuzasidan atroflicha fikr almashildi.
Asosiy e’tibor esa 24-iyul kuni bo‘lib o‘tadigan navbatdagi sessiya kun tartibiga kiritilgan dolzarb masalalarni sifatli tayyorlash masalasiga qaratildi. Ta’kidlanganidek, mahalliy budjet ijrosi, Prezident qarorlari ijrosi, jamoat xavfsizligi, yo‘l harakati xavfsizligi, "Tashabbusli budjet", hududlarni kompleks rivojlantirish, ijro intizomi hamda deputatlik nazorati bilan bog‘liq har bir masala amaldagi qonunchilik talablariga muvofiq dastlab tegishli doimiy komissiyalar tomonidan chuqur o‘rganilishi lozim.
Yig‘ilish davomida doimiy komissiyalar tomonidan sessiya muhokamasiga kiritilayotgan har bir masala yuzasidan joylarga chiqib o‘rganish, nazorat-tahlil tadbirlarini o‘tkazish natijalari ko‘rib chiqildi. O‘rganishlar davomida aniqlangan kamchilik va muammolar, ularning kelib chiqish sabablari hamda ularni bartaraf etish bo‘yicha ishlab chiqilgan amaliy takliflar muhokama qilinib, mas’ullarga tegishli tavsiyalar berildi.
Shuningdek, sessiyaga kiritilayotgan qaror loyihalarining huquqiy asoslari, ularning amaliy samaradorligi hamda deputatlar tomonidan ko‘tarilgan takliflarning to‘liq inobatga olinishi yuzasidan alohida vazifalar belgilandi.
Yig‘ilish yakunida Kengash raisi D.Normuradova tomonidan doimiy komissiyalar faoliyatini yanada faollashtirish, deputatlik nazoratini kuchaytirish, joylardagi muammolarni chuqur tahlil qilish hamda sessiyaga puxta tayyorgarlik ko‘rish orqali qabul qilinadigan qarorlarning sifat va samaradorligini oshirish bo‘yicha aniq topshiriqlar berildi.
Zero, har bir sessiya qarori — aholi manfaatlari, hudud rivoji va mahalliy davlat hokimiyati faoliyati samaradorligini ta’minlashga xizmat qilishi kerak.