O‘rganishlar davomida Samarqand shahri Firdavsiy va Gagarin ko‘chalari kesishgan chorrahada o‘rnatilgan svetofor ariq ichida joylashgani aniqlandi. Kuchli yog‘ingarchilik vaqtida mazkur hududda suv to‘planishi svetofor uskunalarining texnik holatiga salbiy ta’sir ko‘rsatishi, elektr jihozlarining xavfsiz ishlashiga xavf tug‘dirishi hamda yo‘l harakati xavfsizligiga salbiy ta’sir etishi mumkin.

Deputat so‘rovida mazkur hududni mutaxassislar ishtirokida joyida texnik ko‘rikdan o‘tkazish, svetoforning amaldagi joylashuvi amaldagi me’yoriy talablarga muvofiqligini o‘rganish, zarurat tug‘ilganda uni xavfsiz hududga ko‘chirish hamda yomg‘ir va oqova suvlarni oqizish tizimini takomillashtirish bo‘yicha amaliy choralar ko‘rish so‘ralgan.

Shuningdek, o‘rganish natijalari va qabul qilingan qarorlar yuzasidan qonunchilikda belgilangan muddatlarda yozma ma’lumot taqdim etish so‘raldi.

Yo‘l harakati xavfsizligini ta’minlash, fuqarolar murojaatlarida ko‘tarilgan muammolarni o‘z vaqtida bartaraf etish hamda jamoatchilik manfaatlarini himoya qilish deputatlik nazoratining ustuvor yo‘nalishlaridan biridir.

Xalq deputatlari Samarqand shahar Kengashi