O‘zbekiston Respublikasining “Mahalliy davlat hokimiyati to‘g‘risida”gi Qonunining 19¹-moddasi, shuningdek Xalq deputatlari Chilonzor tumani Kengashi hamda Kengashning Ijtimoiy soha, yoshlar siyosati, madaniyat va sport masalalari bo‘yicha doimiy komissiyasining tasdiqlangan ish rejasiga muvofiq, tumandagi ijtimoiy soha obyektlarida kuz-qish mavsumiga tayyorgarlik holatini o‘rganish ishlari boshlandi.

Mazkur o‘rganish doirasida maktabgacha ta’lim tashkilotlari, umumiy o‘rta ta’lim maktablari hamda tibbiyot muassasalarida kuz-qish mavsumiga tayyorgarlik bo‘yicha amalga oshirilayotgan ishlarning holati, jumladan, isitish tizimlarining sozligi, qozonxonalar va ichki muhandislik-kommunikatsiya tarmoqlarining tayyorligi, tom va deraza-romlarning holati, energiya resurslari bilan ta’minlanganlik, zarur moddiy-texnik zaxiralarning shakllantirilishi hamda tegishli tashkiliy choralar ko‘rilishi yuzasidan batafsil ma’lumotlar so‘raldi.

Shu maqsadda Xalq deputatlari Chilonzor tumani Kengashining Ijtimoiy soha, yoshlar siyosati, madaniyat va sport masalalari bo‘yicha doimiy komissiyasi raisi Nazirov Madaminjon Ma’rufjon o‘g‘li tomonidan Chilonzor tumani Maktabgacha va maktab ta’limi bo‘limi hamda Chilonzor tumani Tibbiyot birlashmasiga rasmiy so‘rov xatlari yuborildi.

O‘rganish natijalari doimiy komissiya yig‘ilishida muhokama qilinib, aniqlangan kamchiliklarni bartaraf etish hamda kuz-qish mavsumini barqaror o‘tkazishni ta’minlash yuzasidan tegishli tavsiyalar va zarur choralar ko‘riladi.