Ózbekstan hám Koreya Respublikası arasındaǵı qatnasıqlar búgin tek ǵana ekonomikalıq mápler emes, al óz-ara húrmet, isenim hám jaqın insanıylıq negizlerge tiykarlanǵan birge islesiw sıpatında kórinbekte. Eki xalıqtı jaqınlastırıp atırǵan áhmietli táreplerden biri - zamanagóy rawajlanıwǵa umtılıw menen birge ásirler dawamında qáliplesken qádiriyatlardı úylestire alıw bolıp tabıladı.

Koreya tájiriybesi sonı kórsetedi, global rawajlanıw hám milliy qádiriyatlar bir-birine qarsı emes. Kerisinshe, tariyx, shańaraq, miynet súygishlik, bilimlendiriw hám watandı súyiwshilik sıyaqlı túsinikler jámiyet rawajlanıwınıń áhmiyetli tayanıshın quraydı.

Búgin 180 mıńnan aslam koreys milletine tiyisli watanlaslarımız elimiz turmısında belsendi qatnasıp, túrli tarawlarda múnásip miynet etip atırǵanlıǵın ayrıqsha atap ótiwimiz tiyis. Bul bolsa elimizde milletleraralıq tatıwlıq hám keńpeyillik ortalıǵınıń qanshelli bekkem ekenin kórsetedi.

Eki mámleket arasındaǵı strategiyalıq sherikliktiń ekonomikalıq kólemi de barǵan sayın keńeyip barmaqta. Keyingi jılları sawda aylanısınıń 5 esege artqanı, Koreya investiciyaları 8 milliard dollarǵa jetkeni hám mámleketimizde koreys kapitalınıń qatnasıwında 700 den aslam kárxana jumıs alıp barıp atırǵanı birge islesiwdiń ámeliy nátiyjelerin ayqın kórsetedi.

Prezidentimiz Shavkat Mirziyoyevtiń Koreya Respublikasına saparı eki mámleket qatnasıqlarında jańa perspektivalardı belgilep berdi. Eń áhmiyetlisi, sapar sheńberinde investiciyalıq birge islesiwdiń jańa mexanizmleri hám iri joybarlar ushın bekkem tiykar jaratıldı.

Derlik 12 milliard dollarlıq jańa perspektivalı joybarlardıń qáliplestirilgeni kelesi basqıshta birge islesiw ushın úlken imkaniyatlar bar ekeninen dárek beredi.

Ásirese, Ózbekstannıń tábiyǵıy hám ekonomikalıq potencialın Koreyanıń aldınǵı texnologiyaları, innovaciyalıq tájiriybesi hám investiciyalıq imkaniyatları menen úylestiriw áhmiyetli. Bunday qatnas jańa jumıs orınların jaratıw, zamanagóy óndiristi jolǵa qoyıw, insan kapitalın rawajlandırıw hám aymaqlardıń ekonomikalıq potencialın arttırıwǵa xızmet etiwi múmkin.

Sonday aq, Koreya Eksimbanki menen Strategiyalıq birge islesiw baǵdalaması qabıl etildi. Baǵdarlamada Aralboyı aymaǵında Hayal-qızlar isbilermenligi orayın shólkemlestiriw máselesine de itibar qaratılǵanın ayrıqsha atap ótiw kerek. Bu óz gezeginde hayal-qızlardı isbilermenlikke keńnen tartıw, olardıń biznes baslamaların qollap-quwatlaw hám ekonomikalıq belsendiligin arttırıw, jańa jumıs orınların jaratıw jáne shańaraqlardıń abadanlıǵın támiyinlewde úlken tiykar bolıwı anıq.

Búgin Oraylıq Aziyaǵa qızıǵıwshılıq artıp atırǵan sharayatta Ózbekstannıń Koreya Respublikası menen strategiyalıq sherikligi mámleketimiz ushın texnologiya, investiciya, bilimlendiriw hám innovaciyalar tarawında jańa imkaniyatlardı tartıwda úlken áhmietke iye.

Eń áhmiyetlisi, birge islesiwdiń ekonomikalıq sanlar artında insan mápi turıwı kerek. Texnologiya hám investiciya qanshelli áhmiyetli bolmasın, olar bárinen burın xalıqtıń abadanlıǵı, jaslar ushın imkaniyatlar, sapalı bilimlendiriw hám múnásip miynet sharayatlarına xızmet etse ǵana óziniń haqıyqıy nátiyjesin beredi.

Ózbekstan - Koreya qatnasıqlarınıń búgingi basqıshı mine usı maqsetler jolındaǵı jańa qádemler ushın bekkem tiykar bolıp xızmet etedi.

Janar Alieva

Xalıq deputatları

Shımbay rayonlıq Keńesi

deputatı