#deputat_soʻrovi #poytaxtdeputatlari #deputatlik_faoliyati

❗️ “Ahil” mahallasidagi qurilish masalasi yuzasidan Toshkent shahar prokuroriga deputatlik so‘rovi yuborildi

🏛 Xalq deputatlari Toshkent shahar Kengashi deputati Saidmurod Ibragimov tomonidan Olmazor tumani “Ahil” mahallasi, Uzum bog‘ 9-tor ko‘chasi 71-uy manzilida olib borilayotgan qurilish ishlari yuzasidan Toshkent shahar prokurori A.A. Urmanov nomiga deputatlik so‘rovi yuborildi.

📩 Deputatlik so‘rovi Olmazor tumani 10-“Chuqursoy” saylov okrugida olib borilgan o‘rganishlar hamda “Ahil” mahallasi raisi, faollari va fuqarolardan kelib tushgan jamoaviy murojaat asosida tayyorlandi. Murojaatda Uzum bog‘ 9-tor ko‘chasi hududida 8 ta kottej qurilishi olib borilayotgani va ushbu qurilish bilan bog‘liq qator e’tirozlar bildirilgan.

🏗 Fuqarolarning ma’lum qilishicha, qurilish ishlari 2026-yil 6-iyundan boshlangan bo‘lib, qo‘shni yer uchastkalari mulkdorlarining tegishli tartibdagi roziligi to‘liq olinmagan. Shuningdek, qurilayotgan obyekt derazalarining qo‘shni yer uchastkalariga qarashi, qurilishning avval rejalashtirilgan yo‘l o‘rnida, umumiy foydalanishdagi hududga tutash joyda amalga oshirilayotgani hamda qo‘shni yer uchastkalaridan foydalanishga ta’sir ko‘rsatayotgani yuzasidan e’tirozlar qayd etilgan.

⚠️ Mazkur holat bo‘yicha fuqarolar avval ham mutasaddi tashkilotlarga murojaat qilgan. Xususan, Toshkent shahar Qurilish bosh boshqarmasining 2026-yil 7-iyuldagi 08/05-/1406-sonli xulosasida Uzum bog‘ 9-tor ko‘chasi 71-uydagi obyekt Vazirlar Mahkamasining 2025-yil 28-martdagi 192-son qarori talablari asosida “o‘zboshimchalik bilan qurilgan” deb ko‘rsatilgan va qurilishni 15 kun muddatda o‘z hisobidan bartaraf etish lozimligi bildirilgan.

🔺 Biroq fuqarolarning 2026-yil 21-avgustdagi murojaatida mazkur xulosa va ko‘rsatmaga qaramasdan, qurilish ishlari davom ettirilayotgani ma’lum qilingan.

🔎 Shu munosabat bilan deputat Saidmurod Ibragimov Toshkent shahar prokurori A.A. Urmanovdan mazkur manzilda olib borilayotgan qurilish ishlarining qonuniyligini o‘rganish, obyekt bo‘yicha zarur ruxsat beruvchi hujjatlar, loyiha hujjatlari va tegishli kelishuvlar mavjudligini aniqlashni so‘radi.

⚖️ Shuningdek, qurilish ishlarining qo‘shni yer uchastkalari mulkdorlarining huquq va qonuniy manfaatlariga hamda shaharsozlik normalari va qoidalariga muvofiqligiga huquqiy baho berish, Toshkent shahar Qurilish bosh boshqarmasining avvalgi xulosasida belgilangan 15 kunlik talab nima sababdan bajarilmaganini o‘rganish va qonunchilikda belgilangan tegishli choralarni ko‘rish masalalari qo‘yilgan.

📋 Toshkent shahar prokurori A.A. Urmanovdan deputatlik so‘rovi bo‘yicha o‘rganish natijalari va ko‘rilgan choralar yuzasidan 10 kun muddatda yozma ma’lumot taqdim etish so‘ralgan.

🤝 Mazkur masala fuqarolarning huquq va qonuniy manfaatlarini ta’minlash, qurilish va shaharsozlik talablariga qat’iy rioya etilishi hamda vakolatli organlar tomonidan berilgan xulosa va ko‘rsatmalar ijrosini ta’minlash maqsadida deputat Saidmurod Ibragimov tomonidan nazoratga olindi.

📱 Telegram 📱 Instagram 📱 Facebook 📱 YouTube 🔎 E-kengash