Ámelge asırılıp atırǵan qurılıs hám abadanlastırıw jumıslarınıń barısın úyreniw hám olardıń sapalı orınlanıwın qadaǵalaw maqsetinde, Xalıq deputatları Bozataw rayonlıq Keńesi 3-sanlı «Mádeniyat» saylaw okruginen (ÓzXDP) saylanǵan deputat G.Yusupova hám Keńes sekretariatınıń bas qánegesi S. Alimov birgelikte óz saylaw okrugi aymaǵında alıp barılıp atırǵan jumıslar menen tanıstı.
Úyreniw dawamında, «2026-jılda aymaqlardı rawajlandırıw arqalı xalıqtıń dáramatın arttırıw, turaqlı jumıs orınların jaratıw hám kámbaǵallıqtı qısqartırıw ilajları haqqında»ǵı Prezidentimizdiń PQ-49-sanlı qararı, sonıń menen bir qatarda, Qaraqalpaqstan Respublikası Joqarǵı Keńesi Prezidiumınıń 2026-jıl 6-marttaǵı «Awır rayonlar hám máhállelerdi kompleksli rawajlandırıw baǵdarlamaların tastıyıqlaw haqqında»ǵı 617-sanlı qararı tiykarında ámelge asırılıp atırǵan jumıslar kózden ótkerildi.
Usı baǵdarlamaǵa muwapıq, Bozataw rayonın social-ekonomikalıq rawajlandırıw is-ilajları sheńberinde rayon orayındaǵı A.Dosnazarov kósheleriniń 0,3 km bóleginde jańadan pıyadalar jolın salıw hám túngi jaqtılandırıw shıraqların ornatıw jumısları belgilengen. Házirgi waqıtta bul qurılıs jumısları baslap jiberilip, belgilengen reje tiykarında alıp barılmaqta.
Deputat hám Keńes wákili jumıslardıń sapasına, belgilengen texnikalıq talaplarǵa sáykes orınlanıwına ayrıqsha itibar qaratıp, qurılıs jumıslarınıń óz waqıtında hám sapalı orınlanıwı boyınsha usınıslar berdi.
Ámelge asırılıp atırǵan qurılıs hám abadanlastırıw jumısları deputatlıq baqlawǵa alınıp, olardıń orınlanıwı úzliksiz qadaǵalanadı.