O‘zbekiston Respublikasi Mustaqilligining 35 yilligi — xalqimizning asriy orzu-intilishlari, milliy g‘ururi va Vatanga bo‘lgan cheksiz muhabbatini o‘zida mujassam etgan ulug‘ ayyomdir. Bu sana qalblarimizda ozod va erkin hayot, tinchlik-osoyishtalik hamda yurtimizning yorug‘ kelajagiga bo‘lgan ishonch tuyg‘ularini yanada mustahkamlaydi.
🌏Mustaqillik yillarida O‘zbekiston o‘z taraqqiyot yo‘lini belgilab, barcha sohalarda keng ko‘lamli islohotlarni amalga oshirdi. Eng muhimi, inson qadri, uning huquq va manfaatlarini ta’minlash, xalq farovonligini oshirish davlat siyosatining ustuvor yo‘nalishiga aylandi. Bugun yurtimizning har bir go‘shasida, jumladan, Jondor tumanida ham bunyodkorlik va obodonlashtirish ishlari izchil davom etmoqda. Yangi inshootlar qad rostlab, mahallalar qiyofasi yangilanib, aholi uchun munosib turmush sharoitlarini yaratishga alohida e’tibor qaratilmoqda.
🌏Mustaqillik bizga nafaqat erkin va farovon hayot qurish imkonini, balki Vatan taqdiriga daxldorlik, xalq manfaatiga xizmat qilishdek yuksak mas’uliyatni ham berdi. Xalq deputatlari Jondor tumani Kengashi deputatlari ana shu mas’uliyatni chuqur his etgan holda, fuqarolarning murojaat va takliflarini tinglash, ularning qonuniy manfaatlarini himoya qilish, hududni yanada obod va farovon etish yo‘lida bundan buyon ham faol mehnat qiladi.
🌏Zero, yurt taraqqiyoti va xalq farovonligi — barchamizning mushtarak maqsadimiz. Mustaqillikning qadriga yetish, uni asrab-avaylash va kelajak avlodlarga yanada obod, tinch va farovon Vatan qoldirish har birimizning sharafli burchimizdir.
🌏Fursatdan foydalanib, barcha yurtdoshlarimizni O‘zbekiston Respublikasi Mustaqilligining 35 yilligi bilan chin qalbimdan samimiy muborakbod etaman!
🌏Yurtimiz tinch, osmonimiz musaffo, xonadonlarimiz fayz-u barakaga to‘la bo‘lsin! Har bir oilada mehr-oqibat, farovonlik va quvonch hukm sursin. Mustaqilligimiz abadiy, Vatanimiz ravnaqi va xalqimiz farovonligi yanada yuksak bo‘lsin!

L.Behbudova
Xalq deputatlari Jondor tumani Kengashi raisi