Ózbekstan Respublikası Oliy Majlisi Nızamshılıq palatasındaǵı Ózbekstan Xalıq demokratiyalıq partiyası frakciyasınıń baslıǵı U.Inoyatov basshılıǵındaǵı respublika wákilleri Bozataw rayonına saparı dawamında rayonlıq Keńes deputatları menen birgelikte "BULTEX PRO" tekstil kárxanasında bolıp, kárxananıń óndiris xızmeti menen tanıstı.
Úyreniw dawamında deputatlar hám respublika wákilleri kárxanada islep atırǵan hayal-qızlar ushın jaratılǵan miynet sharayatları, óndiris processleriniń shólkemlestiriliwi, qáwipsizlik talaplarınıń saqlanıwı hám jumısshılarǵa berilip atırǵan sociallıq kepilliklerdi kózden ótkerdi.

Ayrıqsha itibar jergilikli xalıqtı, ásirese, hayal-qızlardı turaqlı jumıs penen támiyinlew, jańa jumıs orınların ashıw hám olardıń ekonomikalıq belsendiligin arttırıw boyınsha ámelge asırılıp atırǵan jumıslarǵa qaratıldı.

Rayon deputatları óz saylaw okruglerinde bántlikti támiyinlew, isbilermenlikti qollap-quwatlaw hám óndiris kárxanaları menen birge islesiwdi kúsheytiw boyınsha alıp barılıp atırǵan jumıslar haqqında pikirlerin bildirdi. Sonday-aq, kárxanalardıń jumısın deputatlıq baqlaw sheńberinde úzliksiz úyreniw hám xalıqtıń bántligin arttırıwǵa qaratılǵan baslamalardı qollap-quwatlawdıń áhmieti atap ótildi.

Sapar juwmaǵında toqımashılıq tarawın bunnan bılay da rawajlandırıw, jańa investiciyalıq joybarlardı ámelge asırıw, eksport imkaniyatların keńeytiw hám xalıqtıń turaqlı bántligin támiyinlew boyınsha ámeliy usınıslar bildirildi.