Xalıq deputatları Bozataw rayonlıq Keńesiniń 2026-jıl 13-fevraldaǵı VIII-19-15-13-216-K/26-sanlı "Bozataw" posyolka puqaralar jıyınları hám "Qusxanataw" hám "Erkindárya" awıl puqaralar jıyınların "Jańa Ózbekstan kelbeti"ne ózgertiw boyınsha ilajlar baǵdarlamasın tastıyıqlaw haqqındaǵı qararınıń orınlanıwı boyınsha deputatlıq qadaǵalaw sheńberinde gezektegi úyreniw jumısları alıp barıldı.
Úyreniwde Xalıq deputatları Bozataw rayonlıq Keńesiniń 7-sanlı "Qutlı mákan" saylaw okrugi deputatı Q.Jamalov hám Keńes sekretariatınıń baslıǵı A.Ibragimov qatnastı.
Úyreniwler dawamında "Erkindárya" APJ aymaǵında "Jańa Ózbekstan kórinisindegi máhálle" baǵdarlaması tiykarında ámelge asırılıp atırǵan qurılıs, abadanlastırıw hám infrastrukturanı rawajlandırıw jumısları kózden ótkerildi. Atap aytqanda, aymaqtı abadanlastırıw, ishki jollardı tártipke keltiriw, injenerlik-kommunikaciya tarmaqların jaqsılaw hám xalıqqa qolaylı sharayatlar jaratıwǵa qaratılǵan joybarlardıń ámelge asırılıw procesi ornında úyrenildi.
Sonday-aq, qurılıs jumıslarınıń sapası, belgilengen múddetlerge ámel etiliwi hám tastıyıqlanǵan ilajlar baǵdarlamasında belgilengen wazıypalardıń orınlanıwı boyınsha juwapker shólkemlerdiń wákilleri menen dodalawlar ótkerildi. Anıqlanǵan máseleler boyınsha tiyisli usınıslar berilip, jumıslardı sapalı hám óz waqtında juwmaqlaw boyınsha zárúr kórsetpeler bildirildi.
Xalıq deputatları Bozataw rayonlıq Keńesi tárepinen usı qarardıń orınlanıwı ústinen deputatlıq qadaǵalaw izbe-iz dawam ettiriledi.