Xalq bilan muloqot, murojaatlarga o‘z vaqtida munosabat bildirish va aholi muammolarini hal etish — deputatlik nazoratining muhim yo‘nalishi!
Xalq deputatlari Parkent tuman Kengashiga 20-«Ulug‘bek» saylov okrugidan saylangan deputat Sultonov Azimjon O‘ktam o‘g‘li o‘ziga biriktirilgan tashkilot — O‘zbekiston Respublikasi Prezidentining Parkent tumanidagi Xalq qabulxonasida bo‘lib, qabulxona mudiri o‘rinbosari Mirislomov Mirshavkat bilan uchrashdi.
Xalq qabulxonasi va Prezident Virtual qabulxonasi orqali kelib tushgan fuqarolar murojaatlari, ularning ko‘rib chiqilishi, aholi muammolarini hal etish borasida amalga oshirilayotgan ishlar hamda murojaatlar bilan ishlash jarayonida aniqlangan kamchiliklar yuzasidan batafsil suhbat o‘tkazildi.
📊 2026-yilning 9 oyi davomida Parkent tumani aholisidan jami 2 203 ta murojaat kelib tushgan. Bu ko‘rsatkich o‘tgan yilning shu davriga nisbatan 41 taga yoki 1,8 foizga kam.
📈 Kelib tushgan murojaatlarning 1 758 tasi qanoatlantirilgan bo‘lib, shundan 725 tasi ijobiy hal etilgan, 1 033 tasi bo‘yicha huquqiy ma’lumotlar berilgan. Shuningdek, 200 ta murojaat yuzasidan tushuntirishlar taqdim etilgan.
⚠️ TAHLIL DAVOMIDA AYRIM MUAMMOLI HOLATLAR HAM ANIQLANGAN
🔹 Takroriy murojaatlar ortmoqda. Joriy yilning 9 oyida 213 ta takroriy murojaat kelib tushgan. Bu o‘tgan yilning mos davriga nisbatan 91 taga ko‘p. Tahlillar ayrim murojaatlar o‘z vaqtida va to‘liq ko‘rib chiqilmagani, fuqarolarga yetarlicha tushuntirish berilmagani takroriy murojaatlarga sabab bo‘layotganini ko‘rsatgan.
🔹 Ayrim tashkilotlarda murojaatlar soni sezilarli oshgan. Jumladan, tuman «Inson» ijtimoiy xizmatlar markaziga 172 ta, oila va xotin-qizlar bo‘limiga 84 ta, tibbiyot birlashmasiga 80 ta murojaat kelib tushgan. Shuningdek, «Oydin», «Fayzobod», «Novdak», «Oqtepa» va «Qo‘rg‘ontepa» mahallalarida ham murojaatlar soni oshgani qayd etilgan.
🔹 Murojaatlarni ko‘rib chiqish muddatlari buzilgan. Tahlilga ko‘ra, uchta murojaat belgilangan 30 kunlik muddatdan kechiktirib ko‘rib chiqilgan. Xususan, kambag‘allikni qisqartirish va bandlik bo‘limida 39 kun, Majburiy ijro byurosi tuman bo‘limida 49 kun, tuman hokimligida esa 98 kun ichida natija kiritilgan holatlar aniqlangan.
🔹 Sayyor qabullarni tashkil etishda kamchiliklar mavjud. Ayrim tashkilotlar tomonidan rejalashtirilgan sayyor qabullar o‘tkazilmagani, qabullarni tashkil etish va ularning natijalarini elektron tizimga kiritishda sustkashlikka yo‘l qo‘yilgani qayd etilgan. Jumladan, Qurilish va uy-joy kommunal xo‘jaligi hamda bandlik bo‘limlari tomonidan rejalashtirilgan qabullar o‘tkazilmagani ko‘rsatilgan.
🔹 Fuqarolar murojaatlarini ko‘rib chiqishda qonuniylik va xolislik masalasi ham e’tiborga olindi. Jumladan, Chinorli MFYda yashovchi fuqaroning ish o‘rnidagi ulushini oshirishga doir murojaati yuzasidan o‘rganish jarayonida fuqaro bilan bog‘lanilmasdan va uning ishtirokisiz nomidan fikrnoma rasmiylashtirilib, tizimga yuklanganligi haqida ma’lumot aniqlangan. Bunday holatlar murojaatlarni ko‘rib chiqishda qonuniylik zarurligini ko‘rsatadi.
‼️ Jamoaviy murojaatlar ham alohida e’tiborni talab etadi. Joriy yilda tumanda 23 ta jamoaviy murojaat kelib tushgan bo‘lib, ularning 6 tasi ijobiy hal etilgan. Bu esa mahalliy darajada hal etilishi mumkin bo‘lgan masalalarni o‘z vaqtida aniqlash, mas’ul tashkilotlar bilan hamkorlikda bartaraf etish va aholiga asoslantirilgan tushuntirishlar berish muhimligini anglatadi.