Xalq deputatlari Namangan shahar Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi yig‘ilishida 2026-yilning uchinchi choragida oilaviy-maishiy zo‘ravonlik va boshqa huquqbuzarliklarning oldini olish borasida amalga oshirilgan ishlar muhokama qilindi.

Namangan shahar prokuraturasi axborotida hisobot davrida oilaviy-maishiy zo‘ravonlik holatlari 50 foizga kamaygani qayd etilgan.

Shu bilan birga, huquqbuzarliklarning barvaqt oldini olish, xavf omillarini aniqlash va profilaktik ishlarni manzilli tashkil etish zarurligi ta’kidlangan.

Muhokama davomida nizoli vaziyatlarga o‘z vaqtida munosabat bildirish, fuqarolarning huquq va qonuniy manfaatlarini himoya qilish, profilaktika subyektlari hamkorligini kuchaytirish hamda ijtimoiy himoyaga muhtoj fuqarolar bilan tizimli ishlash masalalariga e’tibor qaratildi.

Mavzuga muvofiq, O‘zbekiston Respublikasining 2019-yil 2-sentabrdagi O‘RQ-561-son “Xotin-qizlarni tazyiq va zo‘ravonlikdan himoya qilish to‘g‘risida”gi Qonuni o‘rganildi.

Qonunda xotin-qizlarni tazyiq va zo‘ravonlikdan himoya qilish, jabrlanuvchilarning huquq va qonuniy manfaatlarini ta’minlash bilan bog‘liq huquqiy asoslar belgilangan.

Mazkur masala deputatlik faoliyatining 24 ta eng muhim yo‘nalishi doirasida fuqarolarning muammolarini aniqlash, ijtimoiy himoyaga muhtoj shaxslarni qo‘llab-quvvatlash va ularning huquqlarini himoya qilish vazifalari bilan bog‘liq.

Yig‘ilish yakunida oilaviy-maishiy zo‘ravonlikning barvaqt oldini olish, fuqarolar bilan manzilli ishlash va mas’ul tashkilotlar hamkorligini kuchaytirish muhimligi qayd etildi.

Slide 1 of 3