Termiz shahrida mahallalar qiyofasini yanada obod va ko‘rkam qilish, aholi uchun qulay yashash muhitini yaratish hamda “Yangi O‘zbekiston qiyofasi”ni mahallalardan boshlab shakllantirish borasidagi deputatlik nazorati izchil davom ettirilmoqda.

Xalq deputatlari Termiz shahar Kengashining 10-“Navro‘z” saylov okrugi deputati X.Xolmuminov hamda Kengash kotibiyati bosh mutaxassisi A.Temirov tomonidan “Navro‘z” mahallasida hududning obodonligi, sanitariya holati va mavjud muammolarni aniqlashga qaratilgan nazorat-tahlil tadbiri o‘tkazildi.

Mazkur jarayon Oliy Majlis Senati tomonidan mahalliy Kengash deputatlari faoliyati uchun belgilangan “Eng muhim 24 ta yo‘nalish” mezonlari doirasida tashkil etilib, hududlarni obodonlashtirish, aholi uchun qulay va munosib yashash sharoitlarini yaratish masalalariga alohida e’tibor qaratildi.

Nazorat jarayonida mazkur mezonlarning 13-bandida belgilangan talablar asosida boshqaruv kompaniyalari faoliyati samaradorligi, ko‘p qavatli uylarning ichki yo‘laklari (pod’yezdlar), ularga tutash hududlarning tozaligi va obodonligi, shuningdek, yoritilish holati bevosita joyiga chiqqan holda ko‘zdan kechirildi.

Shuningdek, hududdagi obodonlashtirish ishlarining amaldagi holati tahlil qilinib, aniqlangan kamchilik va muammolarni bartaraf etish, mavjud infratuzilmani yaxshilash hamda mahalla hududini yanada ko‘rkam va shinam maskanga aylantirish bo‘yicha tegishli vazifalar belgilandi.