Yunusobod tumani “Xiyobontepa” mahallasi, Bog‘ishamol ko‘chasi, 57/5–57/6-uylar oralig‘ida yuzaga kelgan muammoli holat fuqarolar murojaati asosida xalq deputatlari Yunusobod tumani Kengashi Raisi, deputati Yusupov Ravshan Abilovich tomonidan joyiga chiqib o‘rganildi.

🔎O‘rganish davomida mazkur hududda doimiy yashash joyiga ega bo‘lmagan shaxslar to‘planayotgani, bu esa aholi uchun noqulay vaziyat yuzaga keltirayotgani hamda fuqarolar tomonidan ushbu holat yuzasidan ichki ishlar organlariga murojaatlar qilinganligi aniqlandi.

📩Aniqlangan holat yuzasidan deputat Yusupov R.A. tomonidan tegishli mas’ul tashkilotlarga deputatlik so‘rovi yuborildi.

📝Deputatlik so‘rovida hududdagi vaziyatni atroflicha o‘rganish, jamoat tartibi va fuqarolar osoyishtaligini ta’minlash, shuningdek, aniqlangan muammoni qonuniy tartibda hal etish bo‘yicha tegishli choralar ko‘rish so‘raldi.

📌Deputat so‘rovi “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunning 5 va 8-moddalari asosida yuborildi. Mazkur Qonunning 8-moddasida deputatning vakolatiga kiradigan masalalar yuzasidan tegishli mansabdor shaxslarga deputat so‘rovi yuborish huquqi belgilangan.

🤝Fuqarolar murojaatlarida ko‘tarilgan masalalarni joyiga chiqib o‘rganish va ularning qonuniy hal etilishini nazorat qilish — deputatlik faoliyatining muhim yo‘nalishlaridan biridir.