O‘quvchilarning darsliklar bilan ta’minlanishi ta’lim sifatiga bevosita ta’sir ko‘rsatadigan muhim masalalardan biridir. Shu bois umumta’lim maktablarida ayrim fanlar bo‘yicha darsliklar yetishmasligi yuzasidan kelib tushgan murojaatlar xalq deputatlari Marg‘ilon shahar Kengashi deputati A.Ermatov tomonidan deputatlik nazoratiga olindi.

Mazkur masala yuzasidan Marg‘ilon shahar maktabgacha va maktab ta’limi bo‘limi boshlig‘i M.Alaviddinov nomiga rasmiy deputat so‘rovi yuborilib, mavjud holatni o‘rganish hamda aniqlangan kamchiliklarni bartaraf etish bo‘yicha tegishli choralar ko‘rilishi so‘ralgan.

Deputat so‘rovi shahar maktabgacha va maktab ta’limi bo‘limi tomonidan o‘rganilib, rasmiy javob taqdim etildi. Unda qayd etilishicha, ayni paytda bo‘lim tasarrufidagi 35 ta umumiy o‘rta ta’lim maktabi o‘quvchilari o‘rtacha 94,5 foiz miqdorda darsliklar bilan ta’minlangan.

Darsliklarni taqsimlashda o‘quvchilar kontingenti, sinflar hamda fanlar kesimidagi ehtiyojlar inobatga olingan. Mavjud darsliklar maktablar o‘rtasida ehtiyojdan kelib chiqib qayta taqsimlangan. Ayrim fanlar bo‘yicha yetishmovchilikni to‘liq bartaraf etish maqsadida esa zarur miqdordagi darsliklarni olish yuzasidan tegishli so‘rovlar kiritilgan.

Mas’ullar tomonidan bildirilgan ma’lumotga ko‘ra, yetishmayotgan darsliklarni belgilangan tartibda olish, taqsimlash va ta’lim muassasalariga yetkazib berish jarayoni nazoratga olingan. Mavjud ehtiyojlarni bartaraf etish bo‘yicha tegishli tashkilotlar bilan hamkorlikda ish olib borilmoqda.

Eng muhimi, ta’minotdagi mavjud kamchilikni qisqa muddatda bartaraf etish maqsadida Marg‘ilon shahridagi barcha 35 ta umumiy o‘rta ta’lim maktabini joriy yilning 1-oktabriga qadar 100 foiz darsliklar bilan ta’minlash rejalashtirilgan.

Mazkur masala deputatlik nazorati bilan cheklanib qolmaydi. Darsliklarning ta’lim muassasalariga o‘z vaqtida yetkazilishi va o‘quvchilarga taqdim etilishi shahar maktabgacha va maktab ta’limi bo‘limining mas’ul xodimlari tomonidan doimiy nazorat qilib boriladi.

Aholi murojaatlarida ko‘tarilgan masalaning tegishli tashkilot tomonidan o‘rganilishi va aniq muddat belgilanib, kamchilikni bartaraf etish choralarining ko‘rilishi — deputatlik nazoratining amaliy natijasidir. Ushbu masalaning ijrosi kelgusida ham shahar Kengashi e’tiborida bo‘ladi.