O‘zbekiston Respublikasi Prezidenti Sh.Mirziyoyev raisligida 2026-yil 3-sentyabr kuni kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish yuzasidan o‘tkazilgan videoselektor yig‘ilishida berilgan topshiriqlar ijrosi yuzasidan xalq deputatlari Bo‘stonliq tumani Kengashi raisi O.Babayev va kotibiyat mudiri J.Sadirov tomonlaridan tumanning “Bog‘iston” mahallasida “Kambag‘allik reyestri”ga kiritilgan oilalar bilan olib borilayotgan tizimli ishlar mahalla raisi Sh.Nishonov, hokim yordamchisi S.Ashrapov, ijtimoiy xodim Sh.Raimnazarova ishtirokida muhokama qilindi.

Ma’lumotlarga ko‘ra, ayni vaqtda mahallada 8 ta oila “Kambag‘allik reyestri”ga kiritilgan. Ushbu oilalarning har biri bo‘yicha mavjud muammolarni aniqlash va ularni kambag‘allik holatidan chiqarishga qaratilgan manzilli ishlar tashkil etilgan. Jumladan, 1 ta oilaning muammosi hal etilgan bo‘lib, ushbu oila reyestrdan chiqarilish arafasida. Shuningdek, 4 ta oila davlat ta’minotida bo‘lib, ularga ijtimoiy ko‘mak ko‘rsatish ishlari davom ettirilmoqda. Qolgan 3 ta oila bilan kambag‘allikdan chiqarish bo‘yicha amaliy ishlar olib borilmoqda.

🔻Muhokama jarayonida har bir oilaning holatidan kelib chiqqan holda individual ishlash, mavjud muammolarni aniq belgilash va ularni bosqichma-bosqich hal etish muhimligi ta’kidlandi. Ayniqsa, kambag‘allikdan chiqarish jarayonida oilalarning barqaror daromad manbaiga ega bo‘lishiga qaratilgan amaliy choralarni kuchaytirish zarurligi qayd etildi.

🔻Shuningdek, mahalla raisi, hokim yordamchisi va ijtimoiy xodimning o‘zaro hamkorligini yanada kuchaytirish, reyestrga kiritilgan oilalar bilan olib borilayotgan ishlarni muntazam tahlil qilib borish hamda belgilangan vazifalarning ijrosini nazorat qilish bo‘yicha tavsiyalar berildi.