Mahalliy Kengashlar Reglamenti — xalq deputatlari viloyat, tuman va shahar Kengashlari faoliyatini tashkil etuvchi asosiy ichki normativ hujjat bo‘lib, Kengashning vakolatlarini amalga oshirish, ish yuritish tartibi hamda faoliyatini qonuniy, shaffof va samarali tashkil etishning huquqiy asoslarini belgilaydi.

Reglamentda Kengash sessiyalarini chaqirish va o‘tkazish tartibi, sessiya kun tartibini shakllantirish, masalalarni ko‘rib chiqish va muhokama qilish, qarorlar qabul qilish, ovoz berish tartibi, qabul qilingan qarorlarni rasmiylashtirish va e’lon qilish bilan bog‘liq barcha jarayonlar batafsil belgilab qo‘yiladi.

Shuningdek, Reglamentda deputatlarning huquq va majburiyatlari, deputatlik so‘rovi yuborish, deputatlik nazoratini amalga oshirish, fuqarolar bilan ishlash, saylovchilar bilan muntazam uchrashuvlar o‘tkazish hamda ularning murojaatlarini ko‘rib chiqish tartibi ham o‘z aksini topadi.

Reglament Kengashning doimiy komissiyalari, vaqtinchalik komissiyalar va ishchi guruhlarning faoliyatini tashkil etish, ularning vakolatlari, majlislarini o‘tkazish, xulosalar va tavsiyalar tayyorlash hamda sessiyaga masalalarni kiritish tartibini ham belgilaydi.

Bundan tashqari, Reglamentda Kengash raisi, uning kotibiyati, deputatlar, doimiy komissiyalar hamda boshqa mas'ul subyektlar o‘rtasidagi hamkorlik mexanizmlari, hujjatlar bilan ishlash, ijro intizomi, qabul qilingan qarorlar ijrosi ustidan nazoratni tashkil etish va axborot almashish tartiblari ham nazarda tutiladi.

Mahalliy Kengashlar Reglamentiga rioya etilishi Kengash faoliyatining ochiqligi va oshkoraligini ta'minlash, deputatlarning vakolatlarini samarali amalga oshirish, fuqarolar manfaatlarini himoya qilish hamda hududni ijtimoiy-iqtisodiy rivojlantirishga qaratilgan qarorlarni qonuniy asosda qabul qilishning muhim omili hisoblanadi.