Jondor tumanida xotin-qizlar bandligini ta’minlash, ularning iqtisodiy faolligini oshirish hamda oilalar daromadini ko‘paytirishga qaratilgan amaliy ishlar izchil davom etmoqda. Bu boradagi navbatdagi uchrashuv “Ko‘liyon” mahalla fuqarolar yig‘inida tashkil etildi.

Mazkur hududga Xalq deputatlari Jondor tumani Kengashiga 23-Ko‘liyon saylov okrugidan saylangan deputat U. Ro‘ziyev hamda tuman Kengashi kotibiyati bosh mutaxassisi R. Murodov tashrif buyurib, mahallada amalga oshirilayotgan loyihalar bilan yaqindan tanishdilar.

Uchrashuv davomida aholini, ayniqsa xotin-qizlarni ish bilan ta’minlash, ularning bandligini oshirish va tadbirkorlikka jalb etish masalalari muhokama qilindi.

Suhbat jarayonida pilla qurti yetishtirish orqali oilaviy tadbirkorlikni rivojlantirish istiqbollari alohida e’tibor markazida bo‘ldi. Ushbu yo‘nalish nafaqat xotin-qizlar uchun qo‘shimcha daromad manbai yaratishi, balki yangi ish o‘rinlarini tashkil etish, oilalar farovonligini oshirishda ham muhim ahamiyat kasb etishi ta’kidlandi.

🔹Bunday tashabbuslar mahallalarda xotin-qizlarning iqtisodiy mustaqilligini mustahkamlash, ularni mehnat bozoriga faol jalb etish hamda hududlarda tadbirkorlik muhitini yanada rivojlantirishga xizmat qilmoqda. Jondor tumanida bu boradagi ishlar kelgusida ham tizimli ravishda davom ettiriladi.