#poytaxtdeputatlari #deputatlik_faoliyati

❗️PARLAMENT KOMISSIYASI GRANT TANLOVLARI G‘OLIBLARINI TASDIQLADI

🏛 21-oktabr kuni Oliy Majlis Senatida Fuqarolik jamiyati institutlarini qo‘llab-quvvatlash jamoat fondi mablag‘larini boshqarish bo‘yicha Parlament komissiyasining navbatdagi yig‘ilishi bo‘lib o‘tdi. Yig‘ilishda Parlament komissiyasi a’zosi, Xalq deputatlari Toshkent shahar Kengashi raisi, senator Rustamxon Kalanov ishtirok etdi.

📋 Unda O‘zbekiston–Ozarbayjon qo‘shma grant tanlovi va 2026-yilgi ikkinchi davlat granti tanlovi natijalari, uchinchi davlat granti tanlovini e’lon qilish hamda “Fuqarolik jamiyati haftaligi”ni tashkil etish masalalari ko‘rib chiqildi.

🤝 O‘zbekiston va Ozarbayjon nodavlat notijorat tashkilotlari uchun o‘tkazilgan qo‘shma grant tanloviga kelib tushgan 21 ta loyiha ekspertlar tomonidan baholanib, 2 ta fuqarolik jamiyati instituti loyihasi g‘olib deb topildi.

🔺 Shuningdek, munosib mehnat tamoyillariga rioya etilishini monitoring qilish, nogironligi bo‘lgan bolalar uchun neyroreabilitatsiya xizmatlarini rivojlantirish, maishiy korrupsiyaning oldini olish, odam savdosi jabrdiydalarini psixologik reabilitatsiya qilish va kasbga yo‘naltirish, muammoli oilalar bilan manzilli ishlash hamda mahallalar infratuzilmasini yaxshilashga qaratilgan ikkinchi davlat granti tanlovi natijalari muhokama qilindi.

📊 Mazkur tanlovga kelib tushgan 700 ta loyiha orasidan 88 ta fuqarolik jamiyati instituti g‘olib sifatida tasdiqlandi. Ularning tashabbuslarini amalga oshirish uchun jami 11,6 milliard so‘m yo‘naltirilishi rejalashtirildi.

♻️ Yig‘ilishda 2026-yilgi uchinchi davlat granti tanlovini e’lon qilish to‘g‘risida ham qaror qabul qilindi. Tanlov xotin-qizlar va bolalar huquqlarini himoya qilish, gender tenglikni ta’minlash, korrupsiya va zo‘ravonlikning oldini olish, ekologik muammolarni hal etish, ta’lim va sog‘liqni saqlash sohalarida jamoatchilik nazoratini kuchaytirish kabi yo‘nalishlarni qamrab oladi.

💡 Shuningdek, mahallalar infratuzilmasini yaxshilash, aholi bandligini ta’minlash, yoshlarning huquqiy savodxonligini oshirish va ijtimoiy himoyaga muhtoj fuqarolarni qo‘llab-quvvatlashga qaratilgan loyihalar uchun qariyb 7,1 milliard so‘m mablag‘ ajratilishi belgilandi.

🗓 Yig‘ilishda joriy yilning dekabr oyida o‘tkazilishi rejalashtirilgan **“Fuqarolik jamiyati haftaligi”**ni tashkil etish masalasi ham muhokama qilinib, fuqarolik jamiyati institutlarining murojaatlari ko‘rib chiqildi.

📱 Telegram 📱 Instagram 📱 Facebook 📱 YouTube 🔎 E-kengash