Xalq deputatlari Chilonzor tumani Kengashining navbatdan tashqari yigirma beshinchi sessiyasi bo‘lib o‘tdi. Unda Toshkent shahar hokimi Shavkat Umurzakov, xalq deputatlari Toshkent shahar Kengashi raisi Rustam Kalonov, shahar prokuraturasi, IIBB va boshqa tashkilotlar mutasaddilari, tuman hokimligi jamoasi, nuroniylar hamda MFY yettiliklari vakillari ishtirok etdi. Sessiya kun tartibida tashkiliy masala ko‘rib chiqildi.

Shu vaqtga qadar tuman hokimi lavozimida ishlab kelgan Saidqahhor Xolxo‘jayev O‘zbekiston Respublikasi investitsiyalar, sanoat va savdo vazirining birinchi o‘rinbosari lavozimiga tayinlanganligi munosabati bilan Chilonzor tumani hokimi lavozimidan ozod etildi. Uning o‘rniga shu paytgacha Yangihayot tumani hokimi lavozimida ishlab kelgan Xayot Inogomov Chilonzor tumani hokimi etib tayinlandi.

Sessiyada Toshkent shahar hokimi Shavkat Umurzakov so‘zga chiqib, Saidqahhor Xolxo‘jayevning tumandagi samarali faoliyatini alohida e’tirof etdi. U tuman aholisi bilan doimiy muloqotni yo‘lga qo‘ygani, islohotlarni aholi fikri va takliflarini inobatga olgan holda amalga oshirgani hamda tizimli ishlar natijasida Chilonzor barcha sohada respublika tumanlariga namuna bo‘layotganini ta’kidlab, uning keyingi faoliyatiga muvaffaqiyatlar tiladi. Shuningdek, shahar hokimi yangi tayinlangan rahbar Xayot Inogomovni ham tabriklab, uning Chilonzordagi ishlariga zafarlar yor bo‘lishini tiladi.

Tadbir davomida tuman faollari va nuroniylari ham so‘zga chiqib, ushbu o‘zgarishlar borasida o‘z mulohazalarini bildirishdi. Shundan so‘ng Saidqahhor Xolxo‘jayev so‘z olib, tumandagi faoliyati davomida ko‘rsatgan hamjihatligi uchun Chilonzor ahliga, mas’uliyat bilan ishlagan hokimlik va tashkilotlar xodimlariga o‘z minnatdorchiligini bildirdi hamda yangi hokim Xayot Inogomovga omad tiladi.

Tadbir yakunida Saidqahhor Xolxo‘jayevga Toshkent shahar hokimi tomonidan an’anaviy to‘n va do‘ppi kiygizilib, gullar taqdim etildi.