#Tuman_hokimi

Fuqarolar murojaatlari bilan ishlash, ularning muammolariga qonuniy va adolatli yechim topish hamda aholi roziligini ta’minlash — davlat organlari faoliyatining ustuvor yo‘nalishlaridan biridir.

Xalq deputatlari Nurobod tumani Kengashi deputati, tuman hokimi M.Buranov boshchiligida o‘tkazilgan navbatdagi fuqarolar qabuli ochiq muloqot va amaliy yechimlarga yo‘naltirildi.

Qabulda tuman prokurori J.Abdixakimov, tuman Ichki ishlar bo‘limi boshlig‘i M.Shermuhamedov, tuman soliq inspeksiyasi boshlig‘i M.Erkinov, hokim o‘rinbosarlari, tegishli tashkilot va korxonalar rahbarlari hamda murojaat bilan kelgan fuqarolar ishtirok etdi.

Muloqot davomida fuqarolar o‘zlarini qiynayotgan muammo va masalalarni bayon etib, takliflarini bildirdilar. Xususan, ijtimoiy himoya, bandlik, tibbiy xizmat, kadastr va mulk huquqi, tabiiy gaz, ichimlik suvi va elektr energiyasi ta’minoti, ichki yo‘llarni ta’mirlash kabi dolzarb masalalar ko‘rib chiqildi.

Har bir murojaat mas’ul mutasaddilar ishtirokida atroflicha muhokama qilinib, ularni hal etish yuzasidan tegishli tashkilot rahbarlariga aniq topshiriqlar berildi. Muammolarni bartaraf etish muddatlari va mas’ullar belgilandi. Ayrim murojaatlar esa qabul jarayonidayoq o‘z yechimini topdi.

Shuningdek, fuqarolarning tadbirkorlik faoliyatini yo‘lga qo‘yish, yangi ish o‘rinlari yaratish, imtiyozli kreditlardan samarali foydalanish va oilalar daromadini oshirishga qaratilgan tashabbuslari ham e’tibordan chetda qolmadi.

Asosiy maqsad — fuqarolar murojaatlariga shunchaki javob berish emas, balki ularning muammolarini amalda hal etishdir. Shu bois Nurobod tumanida aholi bilan ochiq muloqotlarni yo‘lga qo‘yish, murojaatlarni o‘z vaqtida ko‘rib chiqish va ularning ijrosini nazorat qilish ishlari izchil davom ettirilmoqda.