Xalıq deputatarı Bozataw rayonlıq Keńesi 3-sanlı “Mádeniyat” saylaw okruginen (ÓzXDP) saylanǵan deputat G.Yusupova hám Keńes sekretariat bas qánegesi S.Alimov penen birgelikte, Bozataw rayonı jaslar orayı imaratında jaslar máslahát topar aǵzaları menen ushırastı.

Ózbekstan Respublikası Oliy Májilis Senatınıń 2025-jıl 26-fevral kúngi “Xalıq deputatları wálayat, rayon hám qalalıq Keńesleri janında jaslar másláhát toparın shólkemlestiriw haqqında”ǵı KQ-102-V-sanlı qararına muwapıq jaslarǵa tiyisli mámleket siyasatın ámelge asırıw, jaslardıń sociallıq-siyasiy belsendiligin qollap-quwatlaw maqsetinde xalıq deputatları Bozataw rayonlıq Keńesi janında jaslar másláhát toparı dúzildi.

Májilis dawamında jaslar máselelerine tiyisli sheshim joybarların islep shıǵıw hám de dodalawda belsendilik penen qatnasıw, jaslarǵa tiyisli máseleler boyınsha usınıslar islep shıǵıw, usı baǵdarda xalıq deputatları rayon Keńesi deputatlarına kómeklesiw máseleleri boyınsha sóz etildi.

Ilaj barısında rayon jasları ózleriniń innovaciyalıq ideyaların, startap joybarların hám mobilografiya baǵdarındaǵı jumısları haqqında aytıp ótti. Jaslar tárepinen bildirgen jańa usınıslar hám ámeliy baslamalar deputat tárepinen qızıǵıwshılıq penen tıńlanıp, olardı ámelge asırıw boyınsha tiyisli qollap-quwatlawlar beriletuǵını atap ótildi.

Ushırasıw jaslar ushın tek pikir almasıw maydanı ǵana bolıp qalmay, bálki olardıń keleshekke bolǵan isenimin bekkemlewshi, jańa jetisliklerge ruhlandırıwshı platformaǵa aynaldı.

Bunday ushırasıwlar rayon jaslarınıń potensialın asırıw hám olardıń innovaciyalıq pikirlewin rawajlandırıwda úlken áhmiyetke iye. Bozataw rayonında bul badardaǵı jumıslar izbe-iz dawam etip, jaslarǵa keń múmkinshilikler jaratılmaqta.