Xalq deputatlari Vobkent tumani Kengashi deputati M. Xayrulloyev tuman Kengashi kotibiyati bosh mutaxassisi Sh. Ismatov bilan hamkorlikda tumanda sport sohasini rivojlantirish borasida amalga oshirilayotgan ishlarni o‘rgandi. O‘rganishlar doirasida Vobkent tumani sport maktabi faoliyati atroflicha tahlil qilindi.

O‘rganishlar natijasida ma’lum bo‘lishicha, bugungi kunda “Besh tashabbus olimpiadasi” sport musobaqalarida 2025-yil davomida 14 ta sport turi bo‘yicha 7 yoshdan 30 yoshgacha bo‘lgan 47 ming 327 nafar yoshlar, ya’ni jami yoshlarning 84 foizi qamrab olingan. Musobaqalar yakunlariga ko‘ra, tuman jamoasi 13 ta medalni qo‘lga kiritib (7 ta oltin, 1 ta kumush, 5 ta bronza), viloyatda faxrli 2-o‘rinni egallagan.

Shuningdek, respublika bosqichida Vobkent tumanidan 6 nafar sportchi ishtirok etib, ulardan biri faxrli 2-o‘rinni qo‘lga kiritgan.

Adaptiv sport turlari bo‘yicha o‘tkazilgan musobaqalarda tumandan 243 nafar nogironligi bo‘lgan shaxs ro‘yxatdan o‘tgan bo‘lib, ulardan 234 nafari, ya’ni 96 foizi faol ishtirok etgan.

Ayni paytda tuman sport maktabida 2 ming 238 nafar yoshlar muntazam shug‘ullanib kelmoqda hamda 69 nafar trenerlar faoliyat olib bormoqda.

2025-yil davomida o‘tkazilgan kompleks sport musobaqalarida Vobkentlik sportchilar tomonidan jami 41 ta medal (12 ta oltin, 14 ta kumush va 15 ta bronza) qo‘lga kiritilgan.

2026-yilning birinchi choragi davomida esa sport maktabiga qo‘shimcha 125 nafar iqtidorli yoshlar qabul qilinib, muntazam shug‘ullanuvchilar soni 5,5 foizga oshirilgan.

Xususan, chim ustida xokkey bo‘limiga 36 nafar, shaxmatga 12 nafar, badiiy gimnastikaga 32 nafar, Turon yakkakurashiga 16 nafar, adaptiv sport turlariga 5 nafar hamda voleybolga 24 nafar iqtidorli yoshlar jalb etilgan.

O‘rganish yakunida tumanda sportni yanada rivojlantirish, yoshlarni sportga keng jalb etish va mavjud infratuzilmadan samarali foydalanish bo‘yicha tegishli taklif va tavsiyalar ishlab chiqildi.