Xalıq deputatları Bozataw rayonlıq Keńesiniń Jergilikli byudjet, isbilermenlikti rawajlandırıw hám ekonomikalıq reformalar máseleleri boyınsha turaqlı komissiyasınıń májilisinde rayon xalqın úzliksiz hám sapalı elektr energiyası menen támiyinlew baǵdarında ámelge asırılıp atırǵan jumıslar haqqında Bozataw rayonlıq elektr támiynatı kárxanasınıń esabatı tıńlandı.
Esabat dawamında rayon aymaǵında elektr tarmaqlarınıń texnikalıq jaǵdayın jaqsılaw, gónergen elektr úskenelerin jańalaw, elektr energiyasın jetkerip beriwdegi úzilislerdiń aldın alıw, transformator punktleri hám elektr uzatıw liniyaların jańalaw boyınsha orınlanıp atırǵan jumıslar haqqında maǵlıwmatlar berildi.
Sonday-aq, xalıqtıń elektr energiyasına bolǵan talabın turaqlı qamtıp alıw, tarmaqlardaǵı júklemeni azaytıw, avariyalıq jaǵdaylardıń aldın alıw hám elektr támiynatındaǵı mashqalalardı tez arada sheshiw máselelerine ayrıqsha itibar qaratıldı.
Komissiya aǵzaları tárepinen esabat boyınsha pikirler bildirilip, elektr támiynatınıń sapasına tásir etip atırǵan máseleler, xalıqtan kelip túsken usınıs hám múrájatlar, sonday-aq, elektr tarmaqlarınıń isenimliligin arttırıwǵa baǵdarlanǵan ilajlardı jáne de jetilistiriw boyınsha tiyisli usınıslar islep shıǵılıp, máselelerdi gezektegi Xalıq deputatları Bozataw rayonlıq Keńesi sessiyasınıń kún tártibine usınıw belgilendi.