Xalq deputatlari Qo‘qon shahar Kengashi deputati F.Qahharova tomonidan "Shaldiramoq" mahalla fuqarolar yig‘inida navbatdagi fuqarolar qabuli o‘tkazildi.

Qabul davomida fuqarolar bilan ochiq muloqot o‘tkazilib, hududdagi mavjud muammolar, aholini qiynab kelayotgan masalalar hamda ularni bartaraf etish yuzasidan taklif va murojaatlar atroflicha muhokama qilindi.

Xususan, fuqarolar tomonidan Turkiston ko‘chasidagi 140, 142 va 144-sonli ko‘p qavatli uylar old qismi hamda Sarboz ko‘chasini asfaltlashtirish masalasi ko‘tarilib, ushbu hududlarda transport harakati va piyodalar uchun qulay sharoit yaratish zarurligi ta’kidlandi.

Shuningdek, Bahmalbop va Naymancha ko‘chalaridagi 140 ta eskirgan simyog‘ochlarni almashtirish hamda transformator punkti (TP) elektr uzatish moslamasini yangilash yuzasidan murojaatlar bildirildi. Mazkur infratuzilma bilan bog‘liq muammolar aholi uchun noqulayliklar tug‘dirayotgani qayd etilib, ularni qisqa muddatlarda bartaraf etish bo‘yicha mas’ul tashkilotlar bilan hamkorlikni kuchaytirish zarurligi ta’kidlandi.

Deputat tomonidan barcha murojaatlar nazoratga olinib, ularni qonunchilikda belgilangan tartibda ko‘rib chiqish, tegishli tashkilotlarga deputatlik nazorati doirasida yuborish hamda amaliy yechim topish yuzasidan zarur choralar belgilandi.

Xalq deputatlari Qo‘qon shahar Kengashi