Deputatlik so‘rovi natijasida Shirin mahallasidagi kanalizatsiya muammosi hal etildi

🏛 Xalq deputatlari Uchtepa tumani Kengashining "24-Shirin" okrugi deputati Shahnoza Mustafayeva tomonidan Uchtepa tumani Shirin mahallasidagi oqava suv tarmoqlari bilan bog‘liq muammo yuzasidan yuborilgan deputatlik so‘roviga mas’ul tashkilotlardan natijasi yuzasidan rasmiy javob taqdim etildi.

📩 Mazkur javobga ko‘ra, Uchtepa tumani 26-mavze, 19-sonli ko‘p qavatli uy hududida joylashgan oqova suv tarmoqlari mutaxassislar tomonidan joyiga chiqib o‘rganilgan hamda quyidagi holatlar aniqlangan:

✍️ 26-mavze 19-uy oldidan o‘tuvchi diametri 200 mm bo‘lgan shahar oqova suv tarmog‘i quvurlari texnik jihatdan soz holatda ekani, quvurlarda sinish yoki yer sathining cho‘kishi holatlari aniqlanmagani qayd etilgan.

🤔 Oqova suv tarmog‘ida yuzaga kelayotgan tiqilishlar va avariya holatlariga asosan aholi tomonidan tarmoqdan noto‘g‘ri foydalanilishi hamda profilaktik tozalash ishlari muddatining kelgani sabab bo‘layotgani aniqlangan.

✅ Shu munosabat bilan Uchtepa tumani oqova suv tarmoqlari bo‘limining joriy ta'mirlash brigadasi tomonidan 26-mavze 19-uy va unga tutash ko‘p qavatli uylar oldidagi oqova suv tarmoqlarida profilaktik tozalash ishlari amalga oshirilgan.

⛏ Tozalash jarayonida quduqlar va quvurlar ichidan pampers, latta, plastik idishlar, rezina buyumlar hamda boshqa maishiy chiqindilar olib tashlangan. Oqova suv tarmoqlari maxsus KO-514 texnikasi yordamida yuqori bosim ostida yuvilib, to‘liq tozalangan. Hozirgi vaqtda mazkur hududdagi diametri 200 mm bo‘lgan oqova suv quvurlari normal gidravlik rejimda ishlayotgani sababli ularni qayta qurish (perekladka) zarurati mavjud emasligi bildirilgan.

🗣 Shuningdek, mas'ul tashkilot tomonidan kelgusida oqova suv tarmoqlarining barqaror ishlashini ta'minlash uchun aholidan maishiy chiqindilarni kanalizatsiya tarmoqlariga tashlamaslik hamda ulardan belgilangan qoidalarga muvofiq foydalanish so‘ralgan.