Búgingi kúnde mámleket tárepinen isbilermenlikti qollap-quwatlaw, xalıqtıń bántligin támiyinlew hám shańaraqlar dáramatın arttırıw maqsetinde jaratılıp atırǵan keń múmkinshilikler óz nátiyjesin berip atır. Sonıń ayqın mısalı sıpatında N.Berdimuratovanıń xızmetin kórsetiwge boladı.
Tanısıw barısında belgili bolǵanınday, isbilermen hákim járdemshisiniń usınısı hám ámeliy járdemi tiykarında kommerciyalıq bankten jeńilletilgen kredit alıp, óz isin baslaǵan. Házirgi waqıtta ol máhalle ortalıǵında zamanagóy sawda orayın shólkemlestirip, xalıqtı azıq-awqat hám kúndelikli tutınıw tovarları menen úzliksiz támiyinlep kelmekte.
Eń áhmiyetlisi, usı baslama arqalı bir shańaraqtıń ekonomikalıq jaǵdayı jaqsılanıp, turaqlı dáramat deregi qáliplesti. Bul bolsa, xalıqtıń óz kúshi hám miyneti menen abadan turmıs qurıwına jaratılıp atırǵan múmkinshiliklerdiń ámeldegi kórinisi esaplanadı.
Ushırasıw dawamında deputatlar isbilermenlikti rawajlandırıw, xalıqtıń iskerlik belsendiligin arttırıw hám jańa jumıs orınların jaratıw baǵdarındaǵı jumıslardıń barısı joqarı ekenligin atap ótti. Sonday-aq, bul sıyaqlı ibratlı tájiriybelerdi keńeytiw arqalı máhállelerdiń ekonomikalıq belsendiligin jáne de kúsheytiw múmkinligi bildirildi.