Xalq deputatlari Chilonzor tuman Kengashi deputati Doniyor Isxakov Toshkent shahar Kengashi deputati Ulug‘bek Rasulov bilan hfmkorlikda 2026-yilning birinchi choragida olib borgan faoliyati yuzasidan saylovchilar bilan uchrashib, axborot taqdim etdilar. 

Mazkur uchrashuv 25-Qatortol saylov okrugiga qarashli “Xalqlar do‘stligi” mahalla fuqarolar yig‘inida tashkil etildi.

Deputatlar o‘z chiqishlarida hisobot davrida Kengash sessiyalari hamda tegishli yo‘nalishlardagi doimiy komissiyalar yig‘ilishlarida faol qatnashganini ta’kidlab, unda poytaxtni ijtimoiy-iqtisodiy rivojlantirish, hududlarni obodonlashtirish, kommunal xizmatlar sifatini oshirish hamda fuqarolar murojaatlarini tizimli hal etishga qaratilgan qator takliflar ilgari surilganini qayd etdilar.

Uchrashuv davomida hududda mavjud dolzarb masalalar muhokama qilindi. Xususan, chiqindilarni o‘z vaqtida olib chiqish tizimini takomillashtirish, noqonuniy qurilishlarning oldini olish, bolalar maydonchalarini barpo etish, mahalla infratuzilmasini yaxshilash va hududni obodonlashtirish kabi yo‘nalishlarga alohida e’tibor qaratildi. Ayrim murojaatlar yuzasidan mas’ul tashkilotlar vakillari ishtirokida muhokamalar o‘tkazilib, muammolarni bartaraf etish bo‘yicha aniq choralar belgilandi.

Shuningdek, deputatlar tomonidan hududlardagi muammolarni joyiga chiqib o‘rganish, tegishli tashkilotlar bilan hamkorlikda ularni bartaraf etish hamda fuqarolar bilan ochiq va muntazam muloqotni yo‘lga qo‘yish ustuvor vazifa sifatida belgilab olindi.

Uchrashuv yakunida fuqarolar tomonidan bildirilgan barcha murojaatlar belgilangan tartibda ko‘rib chiqilishi, ularni ijobiy hal etish yuzasidan mas’ul tashkilotlar bilan hamkorlikda ish olib borilishi hamda deputatlik nazorati ta’minlanishi alohida ta’kidlandi.