Oliy Majlis Qonunchilik palatasi deputatlari, O‘zLiDeP fraksiyasi a’zolari Ekaterina Smesova va Saydullo Azimov Andijon shahridagi “Ozodlik” MFYda joylashgan Abu Ali ibn Sino nomidagi Jamoat salomatligi texnikumida bo‘lib, mavjud sharoitlarni o‘rgandilar.

1974-yilda qurilgan texnikumda 1500 nafarga yaqin o‘quvchi ta’lim olmoqda. Muassasa har yili 800 nafardan ortiq tibbiy mutaxassislarni tayyorlaydi. Germaniya bilan hamkorlikdagi qo‘shma ta’lim dasturi orqali yoshlarga xalqaro mehnat bozoriga chiqish imkoniyati yaratilgan.

O‘rganish davomida binoning ichki yo‘laklari, tashqi fasadi va ayrim qismlari ta’mirga muhtoj ekani aniqlandi. Masala deputatlar, deputatlik guruhi va doimiy komissiya a’zolari nazoratiga olinib, amaliy choralar belgilandi.

O‘rganishda Xalq deputatlari Andijon shahar Kengashi raisi R. Ziyayev va Kengash kotibiyati bosh mutaxassisi Sh. Yusupov ham ishtirok etdi.