Xalq deputatlari Qo‘qon shahar Kengashi deputati R.Talipdjanov tomonidan "Navro‘z" mahalla fuqarolar yig‘inida shahar Kengashining navbatdagi sessiyasi kun tartibiga kiritilgan “Jinoyatchilikka qarshi kurashish va huquqbuzarliklar profilaktikasi sohasida amalga oshirilayotgan ishlar” masalasi yuzasidan o‘rganish va muhokama o‘tkazildi.

Muhokamada deputat R.Talipdjanov, Xalq deputatlari Qo‘qon shahar Kengashi kotibiyati bosh mutaxassisi X.Abdullayev, mahalla fuqarolar yig‘ini raisi N.Ikromov hamda profilaktika inspektori Sh.Sotboldiyev ishtirok etib, mahalladagi kriminogen vaziyat va jamoat xavfsizligini ta’minlash borasidagi ishlarni atroflicha tahlil qildilar.

O‘rganish davomida mahallada huquqbuzarliklarning barvaqt oldini olish maqsadida 201 ta ma’muriy ish qo‘zg‘atilgani, shundan 15 nafar fuqaroga ma’muriy qamoq jazosi tayinlangani hamda 10 nafar xotin-qizga himoya orderi berilgani ma’lum qilindi.

Muhokama jarayonida profilaktik hisobda turuvchi fuqarolar bilan manzilli ishlash, yoshlar va xotin-qizlar o‘rtasida huquqbuzarliklarning oldini olish, "mahalla yettiligi" hamkorligida olib borilayotgan profilaktik tadbirlar samaradorligi muhokama qilindi.

Shuningdek, mahalla hududida faoliyat yuritayotgan tungi klub faoliyatini tartibga solish, tungi vaqtda ishlovchi savdo shoxobchalarining ish rejimini belgilash, videokuzatuv kameralarining texnik holatini nazorat qilish hamda ularning samarali ishlashini ta’minlash masalalariga alohida e’tibor qaratildi.

Muhokama yakunida mahalla hududida jamoat tartibini mustahkamlash, fuqarolar xavfsizligini ta’minlash, jinoyatchilikka sabab bo‘luvchi omillarni bartaraf etish, videokuzatuv tizimlarini yanada kengaytirish hamda aholi o‘rtasida huquqiy targ‘ibot ishlarini kuchaytirish yuzasidan mas’ullarga tegishli tavsiya va takliflar bildirildi.

Xalq deputatlari Qo‘qon shahar Kengashi