Xalq deputatlari Qo‘qon shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi tomonidan O‘zbekiston Respublikasining “Fuqarolar sog‘lig‘ini saqlash to‘g‘risida”gi hamda “Bola huquqlarining kafolatlari to‘g‘risida”gi Qonunlari ijrosi yuzasidan Qo‘qon shahar bolalar stomatologiya poliklinikasida o‘rganish ishlari olib borildi.

O‘rganish ishlari tuzilgan savolnoma asosida tashkil etilib, muassasada bolalarga ko‘rsatilayotgan tibbiy xizmatlarning qonunchilik talablariga muvofiqligi hamda ota-onalar uchun yaratilgan shart-sharoitlar atroflicha ko‘zdan kechirildi.

Jumladan, muassasada bolalarga bepul ko‘rsatiladigan kafolatlangan tibbiy xizmatlar ro‘yxati ota-onalar uchun ko‘rinarli va qulay joyga joylashtirilganligi o‘rganildi.

Shuningdek, bolalarni qabul qilish tartibi, elektron navbat yoki oldindan yozilish tizimining to‘g‘ri va qulay yo‘lga qo‘yilganligi, fuqarolarga xizmat ko‘rsatishda ortiqcha noqulayliklarning oldini olish bo‘yicha yaratilgan imkoniyatlar ko‘rib chiqildi.

Alohida e’tibor imkoniyati cheklangan va nogironligi bo‘lgan bolalar uchun yaratilgan sharoitlarga qaratildi. Xususan, binoda panduslar mavjudligi, eshiklarning kengligi, maxsus xonalar va boshqa zarur infratuzilmalar holati ko‘zdan kechirildi.

O‘rganish davomida aniqlangan holatlar yuzasidan mas’ullar bilan fikr almashilib, bolalarga sifatli va qulay tibbiy xizmat ko‘rsatish, ota-onalar uchun zarur axborotlarni ochiq va ko‘rinarli tarzda taqdim etish hamda alohida ehtiyojga ega bolalar uchun yaratilgan sharoitlarni yanada yaxshilash masalalari muhokama qilindi.

Xalq deputatlari Qo‘qon shahar Kengashi