Xalq deputatlari tuman Kengashi kotibiyati mudiri, deputat V.Xasanov tomonidan Do‘stlik mahallasida mahalla yettiligi bilan ishlash jarayoni o‘rganildi.

O‘rganish davomida mahalla yettiligi a’zolari bilan uchrashib, ularning o‘z yo‘nalishlari bo‘yicha amalga oshirayotgan ishlari, aholi bilan muloqot qilish jarayoni hamda fuqarolardan kelib tushayotgan murojaatlarni o‘rganish va hal etish bo‘yicha olib borilayotgan ishlar yuzasidan fikr almashildi.

Xususan, mahalladagi ijtimoiy himoyaga muhtoj oilalar, ishsiz fuqarolar, yoshlar va xotin-qizlar bilan manzilli ishlash, aholini bandlikka yo‘naltirish, kasb-hunarga o‘qitish, tadbirkorlik tashabbuslarini qo‘llab-quvvatlash hamda oilalarning ijtimoiy holatini yaxshilash masalalariga e’tibor qaratildi.

Shuningdek, mahallada mavjud muammolarni faqat murojaat asosida emas, balki xonadonbay o‘rganish orqali oldindan aniqlash, aniqlangan masalalarni tegishli tashkilotlarga yo‘naltirish va ularning ijrosini nazorat qilish muhimligi ta’kidlandi.

Mahalla yettiligi a’zolari bilan muloqot davomida hududdagi dolzarb masalalar, aholining taklif va murojaatlari, mavjud imkoniyatlardan samarali foydalanish hamda mahallani ijtimoiy-iqtisodiy rivojlantirish borasidagi vazifalar muhokama qilindi.

Deputat V.Xasanov tomonidan mahalla yettiligi faoliyatida har bir yo‘nalish bo‘yicha aniq natijaga erishish, aholi bilan muntazam muloqot qilish va fuqarolarning murojaatlariga befarq bo‘lmaslik zarurligi qayd etildi.

Shuningdek, mahalla yettiligi va deputat o‘rtasidagi hamkorlikni yanada kuchaytirish, hududdagi muammolarni birgalikda o‘rganish va ularni tegishli mas’ullar bilan hamkorlikda hal etish bo‘yicha takliflar bildirildi.