Rayon orayınnan 45 kilometr aralıqta jaylasqan Aspantay APJda ishki jollardıń jaǵdayın jaqsılaw boyınsha ámelge asırılıp atırǵan jumıslar puqaralardıń kewline quwanısh, júregine isenim baǵıshlamaqta.
Ózbekstan Respublikası Prezidentiniń 2026-jıl 5-fevraldaǵı PQ-49-sanlı qararı aymaqlardı jańasha qatnasıqlar tiykarında rawajlandırıw, xalıqtıń dáramatın arttırıw, turaqlı jumıs orınların jaratıw hám kámbaǵallıqtı qısqartıwǵa baǵdarlanǵan qararı tiykarında Aspantay APJdaǵı 2,5 kilometr ishki jolǵa asfalt tósew jumısları ámelge asırıldı. Búgingi kúnde jol boyındaǵı qolaysızlıqlardıń azayıwı, qatnaw hám kúndelikli turmıs ushın qolaylı sharayatlar jaratılıp atırǵanı - aymaq xalqı ushın úlken quwanısh.

Bul jumıslardıń ámelge asırılıw barısın Xalıq deputatları Bozataw rayonlıq Keńesiniń 12-sanlı "Aspantay" saylaw okruginen saylanǵan deputatı G.Jumanazarova, Xalıq deputatları Bozataw rayonlıq Keńesi sekretariatınıń baslıǵı A.Ibragimov hám deputat Sh.Berdaxov Aspantay APJǵa barıp, jerdegi jaǵday menen tanıstı.

Aytpaqshı, bul tek ǵana asfalt tósew emes. Bul - awıl xalqınıń uzaq jıllardan berli kútip atırǵan tilekleriniń biri orınlanıp, adamlar turmısında sezilerli ózgeris júz berip atırǵanınıń kórinisi.
Aspantaylılar menen bolǵan sóylesiwler waqtında puqaralar jańa jolǵa baylanıslı óz pikirlerin bildirip, deputatlarǵa minnetdarshılıǵın jetkerdi. "Búgingi kúnimizge shúkir, elimizge, jerimizge berilip atırǵan itibarǵa raxmet," - degen mazmundaǵı alǵıs sózleri jergilikli adamlardıń keypiyatın sáwlelendirdi.

Xalıq penen birge bolıw, olardıń múrájatların tıńlaw, máselelerin tiyisli tártipte kóteriw hám nátiyjesin baqlap barıw - deputatlıq jumıstıń áhmietli baǵdarlarınan biri.
Aspantay APJdaǵı bunday jaqsı ózgerisler aymaqtaǵı puqaralardıń turmıs sapasın jaqsılawǵa, infrastrukturalıq sharayatlardı jetilistiriwge hám eldiń erteńgi kúnge bolǵan isenimin bekkemlewge xızmet etedi.