Zamanagóy medicina — xalıq den-sawlıǵın saqlawdıń áhmiyetli baǵdarlarınıń biri

Prezidentimiz Shavkat Mirziyoyevtiń Qaraqalpaqstan Respublikasına saparı barısında Qaraqalpaqstan ilimiy-ámeliy medicina akademiyasınıń xızmeti menen tanısıwı densawlıqtı saqlaw tarawındaǵı reformalardıń ámeliy nátiyjelerin kórsetti. Ásirese, xalıqqa sapalı medicinalıq xızmet kórsetiw, zamanagóy bilimge iye mamanlardı tayarlaw hám medicina tarawına jańa texnologiyalardı engiziw máselelerine úlken itibar qaratılmaqta.

Búgingi kúnde medicina tarawı úzliksiz rawajlanıp, zamanagóy bilim hám ámeliy tájiriybege iye mamanlarǵa bolǵan talap artıp barmaqta. Sol sebepli medicina xızmetkerleriniń bilim hám kásiplik uqıplılıǵın xalıqaralıq standartlar tiykarında jetilistiriw áhmiyetli.

Akademiyada jılına 3 mıń shıpaker hám 6 mıń 800 orta medicina hám farmacevtika xızmetkeriniń malakasın arttırıw múmkinshiliginiń jaratılǵanı, sonday-aq Aralboyı aymaqlarınan klinikalıq ordinatorlardı tayarlaw jolǵa qoyılǵanı Qaraqalpaqstan medicina tarawı ushın úlken múmkinshilikler ashpaqta.

Sonıń menen birge, akademiyadaǵı 18 simulyaciyalıq bólmede 50-den artıq baǵdar boyınsha zamanagóy cifrlı hám simulyaciyalıq oqıtıwdıń engiziliwi medicina mamanlarınıń ámeliy kónlikpelerin jetilistiriwge járdem beredi. «Edge Medical» xirurgiyalıq robotınıń engiziliwi bolsa medicina bilimlendiriwi hám ámeliyatında aldıńǵı texnologiyalardan paydalanıw múmkinshiliklerin keńeytpekte.
Men, Xalıq deputatları Bozataw rayonı Keńesi deputatı sıpatında, Qaraqalpaqstanda bunday zamanagóy medicinalıq bilimlendiriw hám ámeliyat orayınıń shólkemlestirilgenin tarawdı rawajlandırıwdaǵı áhmiyetli qádem dep esaplayman. Bunday múmkinshilikler keleshekte rayonlarda medicinalıq xızmet sapasın arttırıwǵa hám medicina xızmetkerleriniń bilim-kónlikpelerin jetilistiriwge de úlken úles qosadı.

Bozataw rayonında da xalıqqa sapalı hám qolay medicinalıq xızmet kórsetiw, medicina mekemeleriniń materiallıq-texnikalıq bazasın jaqsılaw, sonday-aq taraw mamanlarınıń kásiplik dárejesin arttırıw boyınsha jumıslardı izbe-iz dawam ettiriw zárúr.

Prezidentimiz tárepinen belgilenip atırǵan wazıypalardan kelip shıǵıp, xalıq deputatları sıpatında puqaralardıń densawlıǵına baylanıslı máselelerdi úyreniwge, olardıń múrájatların turaqlı túrde baqlawǵa alıwǵa hám densawlıqtı saqlaw tarawın jetilistiriwge baǵdarlanǵan baslamalardı qollap-quwatlawǵa ayrıqsha itibar beremiz.

Xalıq densawlıǵın saqlaw — eń áhmiyetli wazıypalardıń biri. Sapalı medicinalıq xızmet hám bilimli mamanlar bolsa, bul baǵıttaǵı jumıslardıń nátiyjeliligin jáne de arttıradı.

K.Tilewmuratova
Xalıq deputatları Bozataw rayonı Keńesi deputatı