Xalq deputatlari Sirdaryo viloyati Kengashi kotibiyati mudiri, viloyat Kengashi deputati A.Abduraxmonov tomonidan viloyat Kengashining tegishli qarori ijrosi yuzasidan Fayzliobod mahallasidagi "Yog‘ochli Sardoba" obyektida amalga oshirilayotgan ishlar deputatlik nazorati tartibida o‘rganildi.
Mazkur obyekt uchun ajratilgan 2 mlrd 900 mln so‘m mablag‘larning maqsadli va samarali o‘zlashtirilishi, shuningdek, bajarilgan ishlar sifati va obyektning belgilangan talablar asosida foydalanishga topshirilishi masalalariga alohida e’tibor qaratildi.
O‘rganish davomida yagona buyurtmachi — “Oliy Burch Tiklanish” MChJ tomonidan amalga oshirilgan ishlar holati ko‘zdan kechirilib, obyektda mavjud kamchilik va bajarilishi lozim bo‘lgan ishlar belgilab olindi.
Aniqlangan kamchiliklarni bartaraf etish, qolgan ishlarni sifatli va belgilangan talablar asosida yakunlash yuzasidan “Oliy Burch Tiklanish” MChJ rahbari o‘rinbosari Nosirov Kamolga tegishli topshiriqlar berildi.
Shuningdek, belgilangan vazifalar ijrosini muntazam kuzatib borish va obyektdagi ishlarning yakuniga qadar deputatlik nazoratini ta’minlash maqsadida tuman Kengashi kotibiyati bosh mutaxassisi S.Nomozovga doimiy nazorat olib borish vazifasi yuklatildi.
Deputatlik nazoratining maqsadi — kamchilikni qayd etish emas, uni bartaraf etishga erishishdir.

Shu nuqtai nazardan, ajratilgan mablag‘larning samarali sarflanishi, obyektlarning sifatli yakunlanishi va ulardan aholi manfaati yo‘lida to‘laqonli foydalanish ta’minlanishi deputatlik nazoratining ustuvor vazifalaridan biri bo‘lib qoladi.