Ko‘zi ojiz va zaif ko‘ruvchi o‘quvchilar uchun ta’lim imkoniyatlari o‘rganildi

Xalq deputatlari Marg‘ilon shahar Kengashi deputatlari tomonidan hududlarda aholi uchun ijtimoiy xizmatlar ko‘rsatish, ta’lim olish imkoniyatlarini kengaytirish hamda ijtimoiy himoyaga muhtoj fuqarolar uchun yaratilgan shart-sharoitlar muntazam o‘rganib borilmoqda.

Navbatdagi o‘rganish Marg‘ilon shahar 1-Uvaysiy saylov okrugi, “Uvaysiy” mahallasida joylashgan, deputatga biriktirilgan Oʻzbekuston Respublikasi Prezidentini huzuridagi Ijtimoiy himoya milliy agentligi tasarrufidagi Marg‘ilon shahar 2-sonli nurli maskan ixtisoslashtirilgan maktabida o‘tkazildi. O‘rganishda Xalq deputatlari Marg‘ilon shahar Kengashi 1-Uvaysiy saylov okrugi deputati Sh.Madaminova, Kengash kotibiyat mudiri A.Ermatov hamda deputatga biriktirilgan kotibiyat bosh mutaxassisi N.Akbarova ishtirok etdi.

Maktab binosi 1972-yilda qurilgan bo‘lib, 2022-yilda ko‘zi ojiz va zaif ko‘ruvchi bolalar uchun ixtisoslashtirilgan ta’lim muassasasi sifatida qayta tashkil etilgan. Bugungi kunda ta’lim muassasasida 61 nafar o‘qituvchi va xodim mehnat qilmoqda.

Maktabda 9 ta sinf faoliyat yuritib, ularda jami 76 nafar o‘quvchi ta’lim olmoqda. O‘quvchilarga ta’lim berish bilan bir qatorda ularning mustaqil hayotga tayyorlanishi, bilim va ko‘nikmalarini rivojlantirish hamda kelgusida munosib ta’lim yo‘lini davom ettirishiga zarur sharoitlar yaratish muhim vazifalardan biri hisoblanadi.

O‘rganish davomida o‘quvchilarning keyingi ta’lim bosqichiga o‘tishi bo‘yicha erishilgan natijalarga ham e’tibor qaratildi. Xususan, 2025–2026-o‘quv yilida maktabni 11 nafar o‘quvchi tamomlagan bo‘lib, ularning 2 nafari oliy ta’lim muassasalariga o‘qishga kirgani qayd etildi.

O‘rganish jarayonida maktabning kadrlar bo‘limi boshlig‘i B. Usmonova bilan suhbat o‘tkazilib, muassasada faoliyat yuritayotgan xodimlar, ta’lim jarayonini tashkil etish hamda mavjud ehtiyojlar yuzasidan ma’lumotlar olindi.

Mazkur ta’lim muassasasining faoliyatini o‘rganish orqali ijtimoiy himoyaga muhtoj bolalarning sifatli ta’lim olishi, ularning imkoniyatlarini ro‘yobga chiqarishi va jamiyatda munosib o‘rin egallashi uchun yaratilgan shart-sharoitlar holatiga e’tibor qaratildi.

O‘rganish yakunida ta’lim muassasasining mavjud ehtiyojlari, o‘quvchilar uchun sharoitlarni yanada yaxshilash hamda aniqlangan masalalarni tegishli tashkilotlar bilan hamkorlikda hal etish yuzasidan zarur tavsiyalar bildirildi. Mazkur masalalar deputatlik nazorati doirasida kuzatib boriladi.